ԱՄՆ բանակը կստանա 6,8 միլիմետր տրամաչափի ինքնաձիգներ եւ գնդացիրներ

Ամերիկյան զորքերը սկսել են ստանալ M5 ավտոմատներ եւ M250 SAW գնդացիրներ՝ 6,8 միլիմետր ընդհանուր տրամաչափով, որոնք պետք է փոխարինեն, համապատասխանաբար, 7,62 միլիմետր տրամաչափի M4-ին եւ M249 Squad-ին։ Այս մասին տեղեկացրել է Air Force Times-ը։

Նշվել է, որ փոխարինման գործընթացը կտեւի մի քանի տարի, 2023թ. առաջինը նոր զենքը կստանան մերձամարտի օպերատիվ ստորաբաժանումները, ներառյալ հետեւակը, հետախուզությունը եւ սակրավորները։

Ինքնաձիգներն ու գնդացիրներն ունեն Պիկատինի ունիվերսալ սանդղակ, որը թույլ է տալիս տարբեր սարքեր (օպտիկական թիրախներ եւ այլն) միացնել կրակելու համար, ինչպես նաեւ լիցքավորման երկկողմանի համակարգ, որը թույլ է տալիս վերալիցքավորել զենքը ձախ ձեռքով։

Բացի այդ, ե՛ւ M5-ը, ե՛ւ M250-ն ունեն NGSW-Fire Control համակարգչային թիրախային համալիր, որը թույլ է տալիս ուղղել նշանառությունը, այն նաեւ լազերային հեռաչափ ու բալիստիկ հաշվիչ ունի։

Երկու զենքերն էլ պատրաստվել են 2017թ. Պենտագոնի հայտարարած Next Generation Squad Weapon (NGSW) ծրագրի շրջանակում։ Մրցույթին մասնակցել է յոթ պաշտպանական ընկերություն, արդյունքում՝ M5 եւ XM250 արտադրելու իրավունքը բաժին է հասել SIG Sauer-ին, թիրախային համալիրների արտադրությունը՝ Vortex Optics-ին, իսկ 6,8 միլիմետր տրամաչափի փամփուշտներն արտադրելու է Winchester ընկերությունը։