Իսրայելի նոր կառավարության երդմնակալությունը տեղի կունենա դեկտեմբերի 29-ին

Իսրայելի նոր կառավարությունը խորհրդարանի առջև երդում կտա դեկտեմբերի 29-ին: Այս մասին հաղորդում է «Արմենպրես»-ը՝ վկայակոչելով Jerusalem Post պարբերականին:

«Նոր կառավարությունը կվավերացվի Քնեսեթի կողմից և իշխանությունը պաշտոնապես կստանձնի հինգշաբթի օրը»,- գրել է թերթը:

Հաղորդվում է, որ «Լիկուդ» կուսակցության առաջնորդ Բենյամին Նեթանյահուն խորհրդարանի նոր կոալիցիայի անդամներին հաղորդագրություն է ուղարկել՝ նշելով, որ նիստը կսկսվի դեկտեմբերի 29-ին, տեղական ժամանակով ժամը 11.00-ին (Երևանի ժամանակով 13.00-ին):

Քանի որ Քնեսեթի խոսնակ Յարիվ Լևինը պետք է հրաժարական տա, որպեսզի ստանձնի Արդարադատության նախարարի պաշտոնը, հինգշաբթի օրվա նիստի ընթացքում կընտրվի նաև խորհրդարանի նոր խոսնակ:

Հիշեցնենք՝ դեկտեմբերի 22-ին Բենյամին Նեթանյահուն Իսրայելի նախագահ Իսահակ Հերցոգին հայտնել էր, որ իրեն հաջողվել է կառավարություն ձևավորել։ 73-ամյա Նեթանյահուն ավելի վաղ զբաղեցրել է վարչապետի պաշտոնը 1996-1999թթ.-ին և 2009-2021թթ.-ին:

Նեթանյահուն, որի կուսակցությունն առաջին տեղն է զբաղեցրել նոյեմբերի 1-ին կայացած արտահերթ խորհրդարանական ընտրություններում, կառավարություն ձևավորելու մանդատը նախագահից ստացել էր նոյեմբերի 13-ին։

Նեթանյահուի մանդատի ժամկետն ավարտվել էր դեկտեմբերի 11-ին, որից հետո Հերցոգը ևս 10 օրով երկարացրել Էր երկրի նոր կառավարություն ձևավորելու համար Նեթանյահուին տրամադրված ժամկետը։ Իսրայելում արտահերթ խորհրդարանական ընտրություններ են տեղի ունեցել նոյեմբերի 1-ին։

Քվեարկության արդյունքներով՝ Լիկուդե կուսակցությունը ստացել է 120 մանդատից 32-ը, իսկ գործող վարչապետ Յաիր Լապիդի կուսակցությունը՝ 24։ Այս ընտրությունները հինգերորդն էին Իսրայելում 2019 թ.-ից ի վեր։