Ձմեռ պապիկին դեռ նամակ չեմ գրել, եթե գրեմ, խնդրելու եմ, որ ճանապարհը բացվի, գնամ տուն. արցախցի երեխա․ NEWS.am

«Ձմեռ պապիկին դեռ նամակ չեմ գրել, իսկ եթե գրեմ, խնդրելու եմ նրան, որ ճանապարհը բացվի, գնամ տուն»,– NEWS.am-ի հետ զրույցում ասում է արցախցի Լիան։ Նա եղբոր ու մայրիկի հետ ճանապարհի փակվելու հետեւանքով մնացել է Հայաստանում։ Կարոտում է իրենց տունը, հարազատներին, ընկերներին։ Ինքը՝ «Մանկական Եվրատեսիլին», իսկ եղբայրը մարմնամարզության առաջնությանը մասնակցելու համար էին եկել Երեւան։ Առաջ անցնելով շատ տարեկիցներից եղբայրը՝ Վլադիմիրը, պատվավոր երրորդ տեղն է զբաղեցրել։ Ձմեռ պապիկին նամակ գրելու հարցում եւս քրոջից առաջ է ընկել։

«Տրանսֆորմեր մեքենա ու գույնզգույն խաղալիքներ եմ խնդրել Ձմեռ պապիկից»,– ասում է Վլադիմիրը։

«Մանկական Եվրատեսիլին», մրցույթների մասնակցելու եւ այլ նպատակներով Հայաստան եկած ու Արցախը Հայաստանին կապող միակ ճանապարհի փակվելու հետեւանքով Երեւանում ժամանակավոր ապաստանած արցախցի երեխաներին այսօր հյուրընկալել էին «301 իմաստության երկիր» հիմնադրամում՝ ամանորյա խաղալիքներ պատրաստելու եւ Արցախի նարոտ հյուսելու համար։

28 երեխաներից ամենափոքրը 6–ամյա Մարկն է, նրա բաժին գործը գլխավոր աստղը զարդարելն էր, այն պետք է տոնածառի գլխին հանգրվաներ։ Աշխատելիս Մարկը չի սիրում շեղվել, ամբողջովին կլանված իր գործով չի արձագանքում մեր հարցերին։

Մարկի փոխարեն մայրիկը՝ Գալինան պատմեց որդու երազանքների մասին.

«Ուզում է տուն գնալ՝ քույրերի մոտ»։

Տանը՝ Ստեփանակերտում, Մարկի չափահաս երկու քույրերն են մնացել։

«Աղջիկներս են ինձ լավատեսություն ներշնչում, ինձ համար ավելի դժվար է այս վիճակը, կուզեի նրանց կողքին լինել»,– ասում է Գալինա Սիմոնյանը։

13–ամյա Արմանը, որը խաղալիքի վրա «Աղոթենք Արցախի համար» ուղերձն է գրում, Ձմեռ պապիկից խաղաղություն է խնդրում։ Գիտի՝ շոշափելի նվերները այնտեղ՝ Ստեփանակերտում՝ ծնողներից կստանա, հիմա միակ ցանկությունը տուն հասնելն է՝ ծնողներին ու կրտսեր եղբորը տեսնելը, որոնց հետ 13 օր է՝ տեսազանգով է շփվում։

«Կյանքի ճանապարհ» երգը արցախցի Մարին շատ է հավանել, պատմում է՝ սկզբում ուրախացել էր, որ Երեւանում մի քանի օր ավելի կմնա, կշրջի մայրաքաղաքում, տեսարժան վայրեր կայցելի, նոր ընկերներ ձեռք կբերի, բայց իր սպասածից շատ մնաց այստեղ, հասկանում է՝ իրավիճակը շատ ավելի լուրջ է։

Էլգան, որ երազում է դերասանուհի դառնալ, ուսանել Երեւանում, այս օրերին հասցրել է մի քանի մշակութային կենտրոններում լինել։ Ասում է՝ հաճելի եւ օգտակար ժամանակ է անցկացնում, բայց մտքերով Արցախում է։

«Շատ եմ կարոտում, բայց փորձում են այնպես անել, որ չհուսահատվեմ եւ մյուս երեխաներին էլ չընկճեմ։ Մենք այստեղ հասկացանք, որ անկոտրում ենք, չենք հանձնվում ու հույսով սպասում ենք ճանապարհի բացվելուն»,– նշում է Էլգան։

Արցախցի երեխաների համար ամանորյա հրաշքը խաղաղության տեսքն ունի։

«Ձմեռ պապիկին խնդրել եմ՝ կախարդանք կատարի, որ ճանապարհը բացվի, գնանք տուն»,– ասում է Ինեսսան։

Մանրամասները՝ տեսանյութում։