Դիարբեքիրի փողոցները վերածվել են Հայաստանի

Թուրքիայի կառավարության կազմած «ժողովրդավարացման բարեփոխումների փաթեթ»-ը որոշ տեղանունների անվանափոխության հնարավորություն է տալիս: Հանվել է նախկինում եղած օրենսդրական արգելքը և այսւոհետև գյուղերը կարող են վերականգնել մինչև 1980-ականներն օգտագործված իրենց պատմական անվանումները:Այս մասին գրում է ermenihaber-ը:

Ըստ թուրքական «ՊրեսսԹուրք» լրատվական կայքի' Թուրքիայի արևելյան և հարավ-արևելյան շրջաններում բազմաթիվ թաղամասերի, փողոցների և գյուղերի թուրքական անվանումներն արդեն փոխարինվել են հներով կամ ստացել նորերը: Իսկ նահանգների կամ գավառների անունները փոփոխության ենթարկելու համար անհրաժեշտ է խորհրդարանի հավանությունը:
«Դրա համար էլ քրդական «Խաղաղություն և ժողովրդավարություն» կուսակցության (ԽԺԿ-BDP) պատգամավորները մեկը մյուսի հետևից նահանգների անվանափոխության մասին օրինագծեր են ներկայացնում խորհրդարանի հաստատմանը»,- տեղեկացնում է նշյալ լրատվամիջոցը' օրինակ բերելով Դիարբեքիրից առաջադրված պատգամավոր Նուրսել Այդողանի ներկայացրած նախագիծն այդ նահանգի և կից շրջանների նախկին քրդական անվանումները վերականգնելու մասին:

Մասնավորապես առաջարկվում է Դիարբեքիրն անվանել «Ամեդ», իսկ Սուր քաղաքը' «Տիգրան Ամեդ»: Ավելի վաղ «ԽԺԿ»-ական պատգամավորներն օրինագիծ էին ներկայացրել խորհրդարան Վանը Ուան (Wan), Էրզրումը Էրզերոմ, Աղրըն Ագիրի անվանափոխելու մասին:
Վերոնշյալ թուրքական կայքը դժգոհություն է հայտնում, որ Դիարբեքիրի նահանգում շատ փողոցներ հայ գրողների կամ կեղեցիների անուններով են անվանակոչվում: «Դիարբեքիրի փողոցները վերածվել են Հայաստանի»,- գրում է «Պրեսս Թուրք»-ը' ընդգծելով, որ դա անում են այն տեղական ինքնակառավարման մարմինները, որտեղ իշխող են քրդական վերոնշյալ կուսակցության անդամները:
Որպես օրինակ նշվում է Սուր քաղաքի Շեֆթալի փողոցը, որը վերանվանվել է տեղի քաղդեական եկեղեցու անունով' Մար Պետյուն, իսկ Դիրեքչի փողոցը, ի պատիվ հայ գրող Մկրտիչ Մարկոսյանի, կոչվել է նրա անունով: