Հոգեբանները պարզել են, թե ինչու է գաղտնիք պահելը մարդկանց ստիպում վատ զգալ

Գաղտնիք պահելը կարող է մարդկանց հոգեբանական անհարմարություն պատճառել։ Այս մասին հայտնում է Թաֆթսի համալսարանի մամուլի ծառայությունը։

Հետազոտությունն անցկացրել է Կոլումբիայի համալսարանի պրոֆեսոր Մայքլ Սլեպյանը։ 10 տարվա աշխատանքի ընթացքում նա 50 000 մարդու խնդրել է պատմել, թե ինչ են նրանք թաքցնում, եւ պարզել է, որ երբ մարդիկ գաղտնիքներ են պահում, նրանք հակված են ֆիզիկական եւ զգացմունքային տառապանքների: Մարդիկ, որոնք ավելի շատ գաղտնիքներ են պահում, նշում են, որ իրենց առողջությունն ավելի վատ է, նրանք ավելի քիչ հաճույք են ստանում կյանքից, եւ այլ մարդկանց հետ նրանց հարաբերություններն ավելի դժվար են կառուցվում, քան այն մարդկանցը, որոնք ավելի քիչ գաղտնիքներ ունեն:

Սլեպյանի խոսքով՝ մարդկանց մեծ մասն իրեն բարոյական ու լավն է համարում, եւ երբ նրանք իրենց այդ կերպարին համապատասխան չեն զգում, թաքցնում է իրենց սխալ արարքներն ուրիշներից։ «Որքան անբարոյական եք դուք համարում ձեր գաղտնիքը, այնքան ավելի է ամոթ առաջանալու, ինչն էլ տառապանք կպատճառի: Գաղտնիքները կարող են ստիպել մարդկանց մեկուսացված զգալ եւ հեռանալ մյուսներից»,- բացատրում է գիտնականը:

Ամենատարածված գաղտնիքները վերաբերում են ստերին, սեռական վարքագծին, ցանկություններին եւ ընտանիքին: Գիտնականների կողմից հարցված յուրաքանչյուր երրորդ մարդ խոստովանել է դավաճանությունը, ընդ որում՝ պարտադիր չէ, որ ներկայիս հարաբերություններում: Այդ թվի մեկ երրորդն ասել է, որ միշտ թաքցնելու է իր սխալ արարքները: Մյուս մեկ երրորդն ասել է, որ հայտնել է այն երրորդ կողմին: Մնացածը խոստովանել են իրենց զուգընկերոջը։ Որոշ մարդկանց գաղտնիքները ստիպում են մեղավոր զգալ եւ հավատալ, որ նրանք անիրավաչափ են խուսափել պատժից, բացատրում է հետազոտողը: Արդյունքում նրանք մեղքը քավելու համար պատժում են իրենց՝ հաճախ իրենց զրկելով հաճույքից: Այս իրավիճակում գտնվող մարդիկ կարող են ստանձնել տհաճ գործեր, ինչպիսիք են տունը մաքրելը կամ մարզվելը: «Դա կարող է նրանց ստիպել իրենց լավ զգալ, բայց խնդիրն այն է, որ քանի դեռ գաղտնիքը գաղտնիք է մնում, նրանք մտածելու են, որ շարունակում են խուսափել արդարադատությունից, եւ հետեւաբար ինքնապատժման ցիկլը երբեք չի վերջանալու»,- ասում է գիտնականը:

Միաժամանակ պրոֆեսորը հորդորում է ուշադիր ընտրել նրանց, ում հայտնում ես գաղտնիքը։ Պետք չէ դա պատմել նրանց, ովքեր չեն կարող կարեկցել, այլ կվրդովվեն: Նման մարդիկ ավելի հավանական է, որ սկսեն բամբասել՝ անուղղակիորեն պատժելով մարդուն: Եթե գաղտնիքը, որը դուք պահում եք, ոչ մեկին չի վնասում, ապա, հավանաբար, ավելի լավ է մտովի այն թողնել անցյալում: