Սինգապուրցին հայտնվել է բանտում՝ Հյուսիսային Կորեային ելակի կաթ եւ սուրճ վաճառելու համար

Սինգապուրցին հայտնվել է բանտում՝ Հյուսիսային Կորեային 1 միլիոն դոլարի ելակի կաթ եւ սուրճ վաճառելու համար՝ պատժամիջոցները խախտող այլ գործարքներից հետո, որոնց թվում է գինի, վիսկի եւ օծանելիքներ Փհենյան առաքելը, հայտնում է AFP-ն:

59-ամյա Ֆուա Սզե Հին, որը ըմպելիքներ արտադրող Pokka International ընկերության նախկին մենեջերն է, դատապարտվել է հինգ շաբաթվա ազատազրկման՝ իրեն մեղավոր ճանաչելուց հետո:

2017-2018 թվականներին նա վաճառել է ըմպելիքներ, այդ թվում՝ ելակի համով կաթ եւ սրճային ըմպելիքներ սինգապուրյան մի քանի ընկերությունների՝ իմանալով, որ դրանք արտահանվելու են Հյուսիսային Կորեա՝ այնտեղ վաճառելու համար:

Դատական փաստաթղթերի համաձայն՝ նա վաճառքի միջնորդավճար չի ստացել, սակայն դա նրան թույլ է տվել կատարել վաճառքի իր ամսական պլանները:

Սինգապուրից Հյուսիսային Կորեա ապրանքներ արտահանելու համար առավելագույն պատիժը մինչեւ 100 000 սինգապուրյան դոլար (74 000 ԱՄՆ դոլար) տուգանքն է կամ արտահանվող ապրանքների եռապատիկ արժեքը, մինչեւ երկու տարվա ազատազրկումը, կամ ե՛ւ մեկը, ե՛ւ մյուսը։

Վերջին տարիներին մի քանի դեպքեր են գրանցվել, երբ Սինգապուրից ընկերությունները եւ մասնավոր անձինք քրեական հետապնդման են ենթարկվել Հյուսիսային Կորեային արգելված ապրանքներ մատակարարելու համար։

Այս տարի ավելի վաղ սինգապուրյան երկու ընկերությունների մեղադրանք է առաջադրվել Հյուսիսային Կորեա վիսկի, գինի եւ այլ ըմպելիքներ արտահանելու համար։