Պետդեպարտամենտը խոստանում է պատասխանատվության ենթարկել ցեղասպանություն իրականացնողներին

ԱՄՆ պետդեպարտամենտը հայտարարություն է արել ցեղասպանության զոհերի հիշատակի միջազգային օրվա կապակցությամբ։ Հայտարարության մեջ ասվում է ոչ միայն ցեղասպանության հանցագործության զոհերին հիշելու, այլեւ ցեղասպանություն թույլ չտալու կարեւորության մասին այնտեղ, որտեղ դրա նախադրյալները կան, հաղորդում է «Ամերիկայի ձայնը»։

«Աշխարհը պետք է դադար առնի ոչ միայն կորսված կյանքերի մասին հիշելու համար, այլեւ ուշադրություն դարձնի նրանց, ում ցեղասպանությունը նախկինի պես սպառնում է։ Մտորումների եւ հիշատակի այս օրը հիշեցում է ցեղասպանության եւ այլ ոճրագործությունների կանխարգելմանն ու դրանց արձագանքմանը, ինչպես նաեւ մեղավորներին պատասխանատվության ենթարկելու վեհ պայքարին մեր հանձնառությունը վերահաստատելու անհրաժեշտության մասին»,-ասվում է հայտարարության մեջ։

Պետդեպարտամենտի պնդմամբ՝ «ցեղասպանությունը հրեշավոր արարք է»։ «Մեր պարտքն է բարձրաձայնել այդ մասին, իրազեկել եւ հետագա նպատակային քայլեր ձեռնարկել՝ արդարություն պահանջելով։ Մենք պետք է գնահատենք եւ հիշենք զոհերի եւ վերապրածների պատմությունները»,-ասվում է հաղորդագրույան մեջ։

Պետդեպարտամենտը կարծում է, որ «ցեղասպանության սպառնալիքը պահպանվում է այն դեպքում, երբ ցեղասպանության սպիներն ի հայտ են գալիս ամբողջ աշխարհում»։

«Հիշատակելով այս օրը՝ մենք դատապարտում ենք ատելությունը, թշնամանքն ու խտրականությունը, որոնք սնում են Ցեղասպանությունը, եւ վերահաստատում ենք արդարադատություն իրականացնելու եւ ցեղասպանություն իրականացնողներին պատասխանատվության ենթարկելու մեր հանձնառությունը»,-նշվում է Պետդեպարտամենտի հայտարարության մեջ: