Օլաֆ Շոլցին մեղադրում են «խոստումները դրժելու» համար. գերմանական բանակը նոր ֆինանսավորում գրեթե չի ստանում

Գերմանիայի կառավարությունը քննադատության է ենթարկվել՝ իր բանակն ամրապնդելու հարցում բավականաչափ արագ չգործելու համար, իսկ կանցլեր Օլաֆ Շոլցին մեղադրում են մոտ մեկ տարի առաջ երկրի զինվորներին տված «խոստումները դրժելու» համար:

Փետրվարին Ուկրաինայում պատերազմի սկսվելուց երեք օր անց Շոլցը խոստացել էր 100 միլիարդ եվրո լրացուցիչ ծախս սահմանել Բունդեսվերի (գերմանական բանակ) համար՝ հայտարարելով «նոր դարաշրջանի» մեկնարկի մասին, որտեղ Գերմանիան կանի «ամեն ինչ»՝ պաշտպանելու ՆԱՏՕ-ի սահմանները:

Ինը ամիս անց, սակայն, քննադատները դժգոհում են, որ այդ գումարից դեռեւս ոչ մի ցենտ չի ծախսվել:

«Պաշտպանության նախարարությունը դեռեւս գործում է այնպես, ինչպես ամենախաղաղ ժամանակներում, սակայն այն պետք է ռազմական հիմքի վրա դրվի», - The Telegraph-ին ասել է Բունդեսթագում «Քրիստոնեական-դեմոկրատական միություն» կուսակցության ղեկավարի տեղակալ Յոհան Ուադեֆուլը:

Ենթադրվում էր, որ զինամթերքը պետք է գնվեր «ամառվանից ոչ ուշ», - ասել է նա՝ հավելելով, որ Բունդեսվերն, ՆԱՏՕ-ի հանդեպ ստանձնած պարտավորությունների կատարման տեսանկյունից, այժմ «սահմանում է»։

«Վաղուց կարելի էր զինամթերք պատվիրել։ Զենքի ընկերություններն ինձ ասել են, որ զինամթերք են առաջարկել, սակայն կառավարությունը պարզապես չի պատվիրել»,- ասել է Ուադեֆուլը:

«Իհարկե, դուք չեք կարող այդքան արագ տանկեր գնել, սակայն բացարձակապես ոչինչ տեղի չի ունեցել, դա է խնդիրը», - նշել է նա: Զինամթերքի պակասը համարվում է ամենահրատապ խնդիրը, որի համար մոտ 20 միլիարդ եվրոյի ներդրում է պահանջվում:

Ենթադրվում է, որ ՆԱՏՕ-ի ուժերը բավականաչափ զինամթերք կունենան 30 օրվա պատերազմի համար, սակայն գերմանական պաշարները, ըստ տեղեկությունների, բավարար են միայն մի քանի օրվա համար:

Բացակայում է նաեւ բազային հանդերձանքը։ Զինվորներն ասում են, որ ՆԱՏՕ-ի իրենց գործընկերները ծաղրում են իրենց՝ հնացած ռադիոտեխնիկայի համար:

Գերմանիայի ընդդիմության առաջնորդ Ֆրիդրիխ Մերցը (ՔԴՄ)՝ չորեքշաբթի օրը Բունդեսթագում ունեցած բոցաշունչ ելույթի ընթացքում Շոլցին մեղադրել է ռազմական բյուջեն ավելացնելու մասին երկրի բանակին տված «խոստումը դրժելու» համար։

Պաշտպանության նախարար Քրիստին Լամբրեխտն իր վրա է վերցրել վերականգնման դանդաղ տեմպերի մեղքը, ասել է Ուադեֆուլը:

«Շոլցը հասկանում է պահի կարեւորությունը, մարդը, ով չի կատարում իր աշխատանքը, Լամբրեխտն է», - ասել է նա։