Մասկը վերականգնել է Twitter-ում Թրամփի օգտահաշիվը, սակայն նախկին նախագահը չի պատրաստվում վերադառնալ սոցցանց

Twitter-ի ղեկավար Իլոն Մասկը վերականգնել է Միացյալ Նահանգների 45-րդ նախագահ Դոնալդ Թրամփի օգտահաշիվը։ Այս մասին նա հայտարարել է սոցցանցում հարցում անցկացնելուց հետո։ Հարցմանը մասնակցել է 15 միլիոն օգտատեր. 51,8%-ը կողմ է եղել Թրամփի վերադարձին, 48,2%-ը՝ դեմ, գրում է kommersant.ru-ն:

«Ժողովուրդը խոսեց. Թրամփը (օգտահաշիվը) կվերականգնվի»,- գրել է Մասկը Twitter-ում՝ հավելելով լատիներեն Vox Populi, Vox Dei («Ժողովրդի ձայնն Աստծո ձայնն է») ասացվածքը:

Սակայն Թրամփը հայտարարել է, որ Twitter վերադառնալու «ոչ մի պատճառ» չի տեսնում այն բանից հետո, երբ սոցցանցի նոր սեփականատեր Իլոն Մասկը վերականգնել է իր օգտահաշիվը։

«Ես դրա համար որևէ պատճառ չեմ տեսնում, նրանք Twitter-ում շատ խնդիրներ ունեն, տեսեք, թե ինչ է կատարվում», - ասել է Թրամփը Հանրապետական հրեական կոալիցիայի ղեկավարության տարեկան ժողովից առաջ վիրտուալ ելույթի ժամանակ:

Միևնույն ժամանակ, Թրամփը գովաբանել է Մասկին, բայց հասկացրել է, որ նա կմնա Truth Social-ում, հարթակ, որը նա ստեղծել է Twitter-ում արգելափակումից մի քանի ամիս անց:

Մինչ արգելափակումը Թրամփը Twitter-ում ուներ ավելի քան 88 միլիոն հետևորդ:

Twitter-ն արգելափակել է Թրամփի օգտահաշիվը այն բանից հետո, երբ 2021 թվականի սկզբին նրա կողմնակիցները ներխուժել են Կապիտոլիում: Սոցցանցի նախկին ղեկավարությունը կարծում էր, որ Միացյալ Նահանգների 45-րդ նախագահի թվիթերյան էջը կարող էր մարդկանց դրդել խռովության, ընդվզման։

Մասկը հոկտեմբերի վերջին 44 միլիարդ դոլարով գնել է Twitter-ը։ Դրանից հետո ընկերությունն աշխատանքից ազատել է աշխատակիցների կեսին։ Միլիարդատերը խոստացել է թուլացնել մոդերացիայի կանոնները և վերանայել օգտատերերի ստուգումը։