«Սելը ճռալու տեղը` սելվորն ա ճռռում». Մշակույթի փոխնախարարը պարզաբանում է Արմեն Գրիգորյանի` աշխատանքից հեռացնելու պատճառները

«Արմեն Գրիգորյանը գիտի, թե ինքն ինչու է հեռացվել: Վերջին մեկ տարվա ընթացքում նա իր պարտականությունները պատշաճ չի կատարել, իսկ իրենց մեկնաբանությունները իրականությանը չեն համապատասխանում»,- Operativ.am-ի թղթակցի հետ զրույցում նշեց Մշակույթի փոխնախարար Արթուր Պողոսյանը և հավելեց. «Էստեղ են ասում' սելը ճռալու տեղը` սելվորն ա ճռռում»:

Այն դիտարկմանը, որ Երևանի Պարարվեստի պետական քոլեջի տնօրեն Արմեն Գրիգորյանի' աշխատանքից հեռացնելու պատճառը վերջերս դպրոցում ուսանողին խփելու միջադեպն է եղել, փոխնախարարն առարկեց. «Ուսանողի ծնողը մեզ ուրբաթ երեկոյան է բողոքել, նա իր հեռացման հրամանը երկուշաբթի է ստացել, իսկ դեպքի առիթով մշակույթի նախարար Հասմիկ Պողոսյանը ծառայողական քննություն է նշանակել երեքշաբթի. դուք ինքներդ մտածեք' առանց քննության արդյունքների ինչպե՞ս պետք է աշխատանքից հեռացնեինք: Դա նույնիսկ ֆիզիկապես հնարավոր չէր»,- զարմացած ասաց Արթուր Պողոսյանը:

Այն հարցին, թե ի՞նչ է նշանակում' աշխատանքնային պարտականությունները կատարել է ոչ պատշաճ, փոխնախարարը պարզաբանեց. «Աշխատանքային կարգապահության բազմաթիվ խախտումներ, ֆինանսա-տնտեսական գործունեության խախտումներ, որոնք ֆիքսված են և’ մեր աուդիտի կողմից, և’ ֆինանսների նախարարության վերահսկողական վարչության կողմից: Մի պարզ օրինակ' «Գնումների մասին օրենքի» բազմաթիվ խախտումներ: Իսկ ի՞նչ է նշանակում աշխատանքային կարգապահություն. երբ մարդը առավոտյան գա գործի մինչև որոշակի ժամ և այլն, և այլն: Խնդիր չենք դնում, որ տնօրենը առավոտը ժամը 9-ից մինչև 6-ը էնտեղ լինի, բայց երբ որ խորհրդակցություններ են, միջոցառումներ են նախարարությունում, երբ հանձնարարականներ են տրվում նախարարության կոմից կատարել էսքան ժամկետում, էս փաստաթղթերը բերել, էս անել, էն անել, էդ ամեն ինչը չի կատարվում ժամանակին, որը բերում ա ոչ արդյունավետ կառավարման: Մասնավորապես, շատ ծրագրեր դուրս են մնում ուսումնարանի ծրագրից, որ մենք պետք է հասցնենք պատրաստենք, հիմնավորենք, ներկայացնենք կառավարություն, շատ փաստաթղթեր չհիմնավորված են լինում: Ավելին մանրամասնել չեմ ցանկանում»,- ասաց փոխնախարարը:

Արմեն Գրիգորյանի կինը Operativ.am-ի թղթակցի հետ զրույցում նշել էր, որ քոլեջը երեք տարի է նորոգվում է, դեռ չի ավարտվել, իսկ իր ամուսնուց պահանջում են ստորագրել փաստաթղթեր, որ ինքն «ընդունել» է վերանորոգումը: Արթուր Պողոսյանը հակադարձում է ասվածին' հայտարարելով, որ տնօրենը կապ չունի շինաշխատանքների հետ. «Մշակույթի նախարարությունը չի զբաղվում ֆինանսական հարցերով: Այո, որպես տնօրեն նա պետք է աջակցի, պայմաններ ստեղծի, որ արագանա շինարարությունը, երեխաների դասընթացները չխանգարվեն: Բայց մենք ի՞նչ շահագրգռվածություն ունենք մեր տնօրենին պատժելու շինարարական գործընթացների համար: Ոչ մեկ նպատակ չի ունեցել Արմեն Գրիգորյանի անձին պատժելու, նա լավ մանկավարժ է, դասատու, իր ոլորտի պրոֆեսիոնալ, ոչ ոք կասկածի տակ չի դնում այդ հարցերը: Հիմա էլ ենք առաջարկում իրեն շարունակել մանկավարժական գործունեությունը: Խոսքը Արմեն Գրիգորյան տնօրենի մասին է, որը, մեր կարծիքով, ոչ արդյունավետ կառավարում է իրականացրել»,- ասաց Արթուր Պողոսյանը:

Այն հարցին, թե ո՞վ է դառնալու Երևանի պարարվեստի պետական քոլեջի նոր տնօրենը, մոր զրուցակիցը պատասխանեց. «Այս հարցը չի քննարկվում մեզ մոտ, տնօրենի պարտականությունները անցել է փոխտնօրեններից մեկին: Մինչև տարեվերջ բազմաթիվ բաներ ունենք անելու: Ջեռուցման համակարգը պիտի քաշենք, ներքին կանոնակարգեր պիտի մշակենք, և ամենակարևոր խնդիրը բարոյահոգեբանական մթնոլորտը էդ կոլեկտիվում պիտի բարելավվենք: Դրա համար կառավարման խորհուրդ ենք ստեղծել, կառավարման նոր մոդել, որը կանոնադրությամբ հաստատել ենք 5-6 ամիս առաջ: Մենք 1 տարի է մտահոգված էինք քոլեջում էդ գործընթացների համար»,- իր խոսքը եզրափակեց Մշակույթի փոխնախարարը:

Նոյեմբերի 11-ից քոլեջի տնօրենի պաշտոնակատար է նշանակվել  քոլեջի ուսումնական մասով փոխտնօրեն Հասմիկ Մարկոսյանը: