Հնդկաստանի գերագույն դատարանն ազատ է արձակել բռնաբարության եւ սպանության համար մահապատժի դատապարտված տղամարդկանց

Հնդկաստանի գերագույն դատարանն անսպասելիորեն ազատ է արձակել 19-ամյա աղջկա դաժան խմբակային բռնաբարության եւ սպանության համար մահապատժի դատապարտված երեք տղամարդու։ Դատարանը հայտարարել է, որ «ոչ մի համոզիչ, անհերքելի եւ հստակ ապացույց չկա», որ նրանք են կատարել հանցագործությունը, հայտնում է BBC-ն:

Տասը տարի առաջ Դելիից 19-ամյա աղջկան բռնաբարված են գտել հարեւան Հարյանա նահանգի դաշտերում։ 2012 թվականի փետրվարի 9-ի գիշերը Անամիկան երեք ընկերների հետ աշխատանքից տուն վերադառնալիս է եղել, երբ նրան առեւանգել են կարմիր մեքենայով տղամարդիկ։ Սարսափելի հանցագործությունը Հնդկաստանի թերթերի վերնագրերում է հայտնվել այն բանից հետո, երբ չորս օր անց նրա մասամբ այրված, սարսափելի անդամահատված մարմինը հայտնաբերվել է խոշտանգումների նշաններով:

Սակայն երեք դատավորներից բաղկացած կոլեգիան լուրջ հարցեր է բարձրացրել ոստիկանության հետաքննության վերաբերյալ՝ քննադատելով դատական նիստերը դատավարության ընթացքում «բացահայտ բացթողումների» համար:

Որոշումը զայրացրել է զոհի ծնողներին, ցնցել է ակտիվիստներին ու փաստաբաններին եւ զայրույթ է առաջացրել սոցիալական ցանցերում մի երկրում, որտեղ ամեն տարի տասնյակ հազարավոր բռնաբարություններ են գրանցվում:

Անամիկայի հայրն ասել է, որ «արդարության իր հույսերը հաշված րոպեների ընթացքում փլուզվել են»։ «Մենք 10 տարի սպասում ենք արդարության։ Մենք հավատացել ենք դատական համակարգին, հավատացել ենք, որ գերագույն դատարանը կհաստատի մահապատիժը, եւ որ աղջկաս սպանողները ի վերջո կախաղան կհանվեն»,- ասել է նա։

Առաջին ատյանի դատարանը տղամարդկանց մեղավոր է ճանաչել եւ երկու տարի անց նրանց մահապատժի է դատապարտել: Հաստատելով նրանց մահապատիժը՝ բարձր դատարանը մեղադրյալներին «գիշատիչներ» է անվանել։

Բայց գերագույն դատարանը կասկածի տակ է դրել մեղադրող կողմի ներկայացրած ապացույցները եւ ասել է, որ դրանք կեղծվել են: Դատարանը հայտնել է նաեւ, որ մեքենայից առգրավված իրեղեն ապացույցներն ուղարկվել են փորձաքննության փետրվարի 27-ին՝ այն հանելուց գրեթե երկու շաբաթ անց։ «Այս պայմաններում չի կարելի բացառել նմուշների կեղծման հնարավորությունը»,- նշել է դատարանը։