Ամերիկյան Lyft տաքսիների ագրեգատորը աշխատակիցների 13%-ին կազատի աշխատանքից

Ամերիկյան տաքսիների ագրեգատոր Lyft-ը կկրճատի իր աշխատուժի 13%-ը՝ ընկերության բոլոր ստորաբաժանումներից։ Այս մասին հայտնել են Lyft-ի ղեկավարներ՝ գործադիր տնօրեն Լոգան Գրինը եւ նախագահ Ջոն Զիմմերը, գրում է Habr.com-ը։

Աշխատողների կրճատումները պայմանավորված են հաջորդ տարի հնարավոր ռեցեսիայի եւ ճամփորդական ապահովագրության ծախսերի աճի հետ կապված ընկերության մտավախություններով: Lyft-ը չի փոխել նախորդ եռամսյակի իր կանխատեսումը:

Տարեսկզբից ագրեգատորի բաժնետոմսերն էժանացել են գրեթե 68%-ով։ Lyft-ն ունի 5 միլիարդ դոլարից պակաս շուկայական արժեք եւ ավելի քան 5000 աշխատակից:

Ղեկավարությունը նշել է, որ ազատված աշխատակիցները կստանան տասը ամսվա աշխատավարձ, առողջապահական ապահովագրություն մինչեւ 2023 թվականի ապրիլի վերջը եւ աջակցություն հետագա աշխատանքի համար։ Աշխատակիցները, ովքեր ավելի քան չորս տարի աշխատել են Lyft-ում, կստանան լրացուցիչ չորս շաբաթվա աշխատավարձ:

Ընկերության տնօրենները հույս ունեն, որ Lyft-ը հաջորդ տարի ստիպված չի լինի փոխել ծրագրերը՝ արձագանքելով արտաքին իրադարձություններին։ Նրանք կարծում են, որ ներկայիս կրճատումները ընկերությունը կնախապատրաստեն գալիք դժվարություններին։

Lyft-ը նախատեսում է նաեւ վաճառել ավտոմեքենաների սպասարկման իր բիզնեսը, գրում են Green-ը եւ Zimmer-ը: Նրանք ակնկալում են, որ աշխատակիցներին աշխատանք կառաջարկվի ձեռքբերող ընկերությունում։

Ավելի վաղ ագրեգատորը դանդաղեցրել, ապա սառեցրել է նոր աշխատողների հավաքագրումը՝ նպատակ ունենալով կրճատել ծախսերը: Բացի այդ, Lyft-ը դադարեցրել է որոշ կարեւոր նախագծեր:

Lyft-ը միակ տեխնոլոգիական ընկերությունը չէ, որը հայտարարել է անձնակազմի կրճատման եւ աշխատանքի ընդունման դադարեցման մասին: Մայիս-հունիս ամիսներին Netflix-ը աշխատանքից ազատել է 450 աշխատակցի։ Հունիսին Spotify-ը հայտարարել է, որ 25%-ով կրճատում է աշխատանքի ընդունման ծրագիրը։ Նման միջոցներ են ձեռնարկել նաեւ Alphabet-ը, Meta-ն, Amazon-ը, Shopify-ը, Coinbase-ը, Stripe-ը եւ այլ ընկերություններ։