Զատուլինը այցելելու էր Ջերմուկ

Կառավարությունը անցանկալի անձ է համարել  ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինին և արգելել է նրա մուտքը Հայաստանի Հանրապետություն։ 

Որպես պատճառ նշվում է այն, որ իր հրապարակային հարցազրույցներում Զատուլինը մեղադրել է ՀՀ իշխանությանը 44-օրյա պատերազմի պարտության համար և ասել է, որ Փաշինյանը պետք է հեռանա։ Իրականում սակայն հարցը ոչ թե Զատուլինի հարցազրույցներն են, այլ ՀՀ իշխանությունների վախը Լազարևյան ակումբի հերթական նիստից, որը նախատեսված էր անցկացնել հոկտեմբերի 28-ին և որի հիմնադիրն ու նախագահը  Կոնստանտին Զատուլինն էր։ 

Երեկ նա նամակով դիմել էր փոխվարչապետ Մհեր Գրիգորյանին, խնդրելով, որ թույլ տան ակումբի մասնակիցներին այցելել Ջերմուկ։ 

«Նիստի ռուսաստանյան մասնակիցները մեծ հետաքրքրվածություն են ցուցաբերում ծանոթանալու Ջերմուկ քաղաքում և շրջակայքում ստեղծված իրավիճակին այդ ուղղությամբ ադրբեջանական զինուժի առաջխաղացման հետ կապված։ Խնդրում ենք աջակցել իմ և նիստի մասնակիցների այցելությանը Ջերմուկ մեկ օրով, որը տեղի կունենա հոկտեմբերի 29-ին /մասնակիցների ենթադրյալ թիվն է 50, երկու ավտոբուսներով/։ Այցի կազմակերպումն ու տրանսպորտային ծախսերը «Լազարևյան ակումբը» վերցնում է  իր վրա», - գրում է Կոնստանտին Զատուլինը։  

Գուցե այս նամակն է ահաբեկել մեր կառավարիչներին և նրանք որոշել են պարզապես արգելել Զատուլինի մուտքը Հայաստան։