Իրանը ծրագրում է ավելացնել գազի արտահանումը Թուրքիա

Իրանը ծրագրում է առաջիկա վեց ամիսների ընթացքում ավելացնել գազի արտահանումը Թուրքիա։ Իրանի գազի ազգային ընկերության (NIGC) դիսպետչերական դեպարտամենտի ղեկավար Մոհամմադռեզա Ջուլայը ներկայացրել է BOTAS-ի ներկայացուցիչների հետ վերջերս կայացած հանդիպման արդյունքները, հայտնում է Tasnim լրատվական գործակալությունը։

Նրա խոսքով՝ համաձայնագրերի համաձայն՝ Իրանը եւ Թուրքիան կհամակարգեն առաջիկա վեց ամսվա ընթացքում Թուրքիա գազի արտահանման հետ կապված բոլոր տեխնիկական եւ գործառնական գործողությունների ծրագրերը։

Նա նշել է, որ այդ ծրագրերը ներառում են գործառնական ծրագրերի լայն շրջանակ, ինչպիսիք են վերանորոգումը եւ սպասարկումը, երկու հարեւանների միջեւ խողովակաշարերի կառուցումը եւ Բազարգանի սահմանային անցակետի կոմպրեսորային կայանի վերակառուցումը:

«Իրանը հայտնի է որպես գազի մատակարարման հուսալի աղբյուր ողջ աշխարհում։ Ուստի մենք պետք է գիտակցենք այս դիրքորոշման կարեւորությունը եւ ընդունենք դրա մարտահրավերները»,- ասել է Ջուլայը։

991,6 տրիլիոն խորանարդ ֆուտ բնական գազի ապացուցված պաշարներով Իրանն աշխարհում երկրորդն է գազի պաշարներով՝ Ռուսաստանից հետո:

Թեեւ Իրանում գազի արդյունահանումը հիմնականում նախատեսված էր ներքին պահանջարկը բավարարելու համար, 2001 թվականի վերջին Իրանը սկսել է գազ արտահանել Թուրքիա: Ի լրումն իրանական գազի շուկայից օգտվելու Թուրքիայի ցանկության, բնական գազի հսկայական պաշարները գրավում են նաեւ միջազգային էներգետիկ ընկերություններին՝ ամբողջ աշխարհում: