Գիտնականները 12 միլիոն տարվա վաղեմության հրաբխային մոխիր են հայտնաբերել Միդ լճի հատակին

CNN-ը հոդված է հրապարակել Լաս Վեգասի Նեւադայի համալսարանի գիտնականների ուսումնասիրության մասին, որոնք հրաբխային մոխիր են հայտնաբերել Միդ լճի չորացած հատակին՝ հրաբխային մոխրով պատված քարերը վկայում են հրաբուխների ժայթքումների մասին, որոնք տեղի են ունեցել մոտ 12 միլիոն տարի առաջ:

Վերջին ամիսներին ամերիկյան Միդ լճում ջրի մակարդակի անկումը մի քանի ցնցող բաներ է բացահայտել, այդ թվում՝ հին ռազմանավեր, խորտակված նավակներ եւ մարդկային մնացորդներ: Ջրի ռեկորդային ցածր մակարդակը բացահայտել է նստվածքային ապարներ, որը չէր հանդիպել 1930-ականներից, երբ կառուցվել է Հուվեր ամբարտակը եւ լիճը լցվել է ջրով: Այս ապարներում գիտնականներին հաջողվել է հայտնաբերել Այդահոյի, Կալիֆոռնիայի եւ Վայոմինգի հրաբուխների մոխրի կուտակումներ:

«Մենք գիտեինք մոխրի այս բլոկների գոյության մասին, բայց զարմացանք՝ գտնելով այդքան մեծ քանակությամբ, երբ Միդ լճում ջրի մակարդակը իջավ»- ասում է UNLV-ի երկրաբանության վաստակավոր պրոֆեսոր եւ հետազոտության համահեղինակ Յուջին Սմիթը:

Արեւմուտքում սաստիկ երաշտը եւ Կոլորադո գետի ջրի ինտենսիվ օգտագործումը հանգեցրել են լճում ջրի մակարդակի աննախադեպ անկման: Սեպտեմբերին այն կազմել է հնարավոր լրիվ հզորության 27 տոկոսը։

Գիտնականներն օգտագործում են այս հնարավորությունը՝ ուսումնասիրելու այն հանքավայրերը, որոնք չեն բացահայտվել մոտ մեկ դար: Հետազոտողների կողմից հայտնաբերված մոխիրը սպիտակ եւ մոխրագույն է եղել: Նրանք նմուշներ են վերցրել լաբորատորիայում ուսումնասիրության համար, սակայն ասում են, որ արդեն պարզ է, որ դրանք մի շարք ժայթքումների հետեւանքով առաջացած մոխիր են: