Քանաքեռ-Զեյթունի ոստիկանները մեքենաներից գողության դեպքեր են բացահայտել

Ոստիկանության Քանաքեռ-Զեյթունի բաժնի ծառայողները հոկտեմբերի 14-ին Դավիթ Անհաղթի փողոցում «Տոյոտա» մակնիշի մեքենայի չեզոքացուցիչը գողանալու պահին ձերբակալել և բաժին են տեղափոխել 36 և 44 տարեկան երկու տղամարդու։

Խուզարկությամբ 36-ամյա տղամարդու սպորտային պայուսակում հայտնաբերվել է ավտոմեքենայի չեզոքացուցիչ, «Մերսեդեսի» անվահեծի կափարիչ, 11,5 սմ շեղբի երկարությամբ դանակ, հարթաթուղթ և մետաղյա սղոց:

Քանաքեռ-Զեյթունի քրեական հետախույզների ձեռնարկած միջոցառումների շնորհիվ պարզվել է, որ նրանք նույն օրը գողացել էին Դավիթ Անհաղթի փողոցում կայանված «Լեքսուսի» չեզոքացուցիչը՝ մեքենայատիրոջը պատճառելով մեկ միլիոն դրամի վնաս:
Գողոնն առգրավվել է: Տղամարդիկ ձերբակալվել են:

Պարզվել է նաև, որ նրանք փորձել էին գողություն անել նաև Ուլնեցու փողոցի հասցեներից մեկում կայանված «Լեքսուսից», սակայն մեքենայատիրոջ կողմից նկատվելով՝ հեռացել էին:
Կազմված փաստաթղթերն ուղարկվել են նախաքննական մարմին:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: