Կինը ծնողներից ամաչելու պատճառով երկու տարի գնացել է գոյություն չունեցող աշխատանքի

Ավստրալիայից Ջեյն Լուն իր ծնողների թիկունքում բազմամիլիոնանոց բիզնես է սկսել և երկու տարի ձևացրել, թե գնում է գրասենյակ՝ նրանց չհիասթափեցնելու համար։ Այս մասին հայտնում է 7News-ը։

Երբ Լուն ութ տարեկան էր, նրա ընտանիքը Չինաստանից տեղափոխվեց Ավստրալիա: Կնոջ ծնողները միշտ ցանկացել են, որ նա դառնա բժիշկ, իրավաբան կամ հաշվապահ։ Ծնողների սպասելիքներն արդարացնելու համար դուստրը ֆինանսների ոլորտում բարձր վարձատրվող աշխատանք է գտավ հեղինակավոր ընկերությունում, բայց արագ հասկացավ, որ չի կարող աշխատել գրասենյակում։

Լուն չցանկացավ տխրեցնել իր ընտանիքին և խոստովանել, որ ատում է այն, ինչ անում է։ Փոխարենը դուրս եկավ գործից, բայց ծնողների հանգստության համար ամեն առավոտ շարունակեց վեր կենալ, կոստյում հագնել ու գնալ գոյություն չունեցող աշխատանքի։ «Ես շատ էի ամաչում այն ​​ամենից, ինչ անում էի, և ինձնից հիասթափված էի այս իրավիճակում հայտնվելու համար», - հիշում է 36-ամյա Լուն։

Կինը փորձել է սեփական բիզնեսը բացել, սակայն չի հաջողվել: Հետո նա աշխատանքի է ընդունվել որպես ադմինիստրատոր և շարունակել զբաղվել բիզնեսով։ 2010 թվականին Լուն բացել է իր «Showpo» նորաձևության առցանց խանութը։ «Ծնողներս գիտեին, որ ես բացել եմ Showpo-ն, բայց նրանք կարծում էին, որ դա լրացուցիչ եկամտի աղբյուր է»,- ասում է նա։

Երկու տարի անց բիզնեսը վերելք էր ապրում, և Լուն ամբողջ ճշմարտությունն ասաց իր ընտանիքին: Նա կարողացավ մարել իր հիփոթեքը և ծնողների համար նոր մեքենա գնել։

Ներկայումս ապրանքանիշն իր արտադրանքը մատակարարում է ավելի քան 120 երկրների: Showpo-ն աշխարհի ամենամեծ հագուստի առցանց խանութներից մեկն է։ «Եթե դուք արդեն ունեք բիզնես գաղափար, ապա պարզապես սկսեք, որովհետև երբեք չեք սովորի այնքան շատ բան, որքան ընթացքում: Պարզապես պետք է ճարպիկ լինել»,- ասում է Լուն: