Մահացած են գտել «Բարսելոնայի» նախկին ֆուտբոլիստ Արտուրո Վիդալի հորը

Թուրինի «Յուվենտուսի», Մյունխենի «Բավարիայի», կատալոնական «Բարսելոնայի» ու իտալական «Ինտերի» նախկին կիսապաշտպան Արտուրո Վիդալի հայրը հեռացել է կյանքից:

61-ամյա Էրասմո Վիդալին մահացած են գտել աշխատավայրում՝ Hípico de Santiago ձիարշավարանում: Բժշկական փորձաքննությունը ցույց է տվել, որ նա մահացել է սրտի կաթվածից:

«Մենք տեղեկացանք, որ նա գիշերն է մահացել: Էրասմոն հետևում էր ձիերին, որոնք պատկանում են նրա որդուն: Նա սրտի կաթված է ստացել, և Արտուրոն արդեն գալիս է այստեղ»,- ձիարշավարանի աշխատակիցներից մեկի խոսքերը մեջբերել է ADN-ն:

35-ամյա Վիդալն այժմ խաղում է բրազիլական «Ֆլամենգոյում»: Առաջնության 12 խաղում նա խփել է 2 գոլ: Չիլիի հավաքականում անցկացրած 133 խաղում Վիդալը դարձել է 32 գոլի հեղինակ: