Բրյուսովի անվան պետական համալսարանը փակելու գաղտնի նախագիծ է շրջանառվում.համալսարանն ու ԿԳՄՍՆ-ն առայժմ չեն մեկնաբանում

ԿԳՄՍ նախարարությունում գաղտնի նախագիծ է շրջանառվում, որով նախատեսում են փակել Վ. Բրյուսովի անվան պետական համալսարանը։ Այս մասին այսօր՝ հոկտեմբերի 12-ին, ֆեյսբուքյան իր էջում գրել է համալսարանի սոցիալական գիտությունների եւ սերվիսի ֆակուլտետի դեկան Ցոլակ Ակոպյանը։

«Երեկ պարզվեց, որ ԿԳՄՍ-ում գաղտնի նախագիծ է շրջանառվում, որով նախատեսում են փակել Վ. Բրյուսովի անվան պետական համալսարանը։ Այս «ժողովրդավար» կառավարության համար կարծես սովորական աշխատաոճ է դարձել կարեւոր որոշումների թաքուն ընդունումը։ Ի դեպ՝ երեկ, երբ Հոգաբարձուների խորհրդի նիստում քննարկվում էր Ռեկտորի ընտրության մրցույթ հայտարարելու հարցը, օրակարգի հաստատմանը դեմ էին արտահայտվում Կառավարության ներկայացուցիչները ՝ բերելով այն փաստարկը, թե այս պահին շրջանառվում է բուհերի միավորման հարցը։ Մեկ է չեք կարողանալու մեկ որոշմամբ վերացնել 90-ամյա ավանդույթ ունեցող բուհը»,- գրել է նա։

NEWS.am-ին համալսարանի հանրային կապերի բաժնից ասացին, որ այդ թեմայի առնչությամբ ապագայում ունենալու են քննարկում. «Այս պահին մեկնաբանությւոն չենք տալիս»։

Մեզ հետ զրույցում ՀՀ ԿԳՄՍ նախարարի մամուլի քարտուղար Գեղամ Մելիքբեկյանն էլ նշեց, որ առաջիկա ժամերի ընթացքում նախարարությունը հանդես կգա հայտարարությամբ։