G7-ի երկրները Ուկրաինայի վերաբերյալ համատեղ հայտարարություն են ընդունել

Յոթնյակի երկրների (Մեծ Բրիտանիա, Գերմանիա, Իտալիա, Կանադա, ԱՄՆ, Ֆրանսիա և Ճապոնիա) առաջնորդները Ուկրաինայի շուրջ ստեղծված իրավիճակի վերաբերյալ համատեղ հայտարարություն են ընդունել առցանց ռեժիմով, որը երեքշաբթի օրը տարածել է Գերմանիայի կաբինետի մամուլի ծառայությունը։

-«Մեծ յոթնյակի» երկրները դատապարտում և միանշանակ մերժում են Ռուսաստանի «բռնակցման անօրինական փորձը»՝ ի հավելումն Ղրիմի Ինքնավար Հանրապետության և Սևաստոպոլի՝ Ուկրաինայի Դոնեցկի, Լուգանսկի, Զապորոժիեի և Խերսոնի շրջանների։ Նրանք երբեք չեն ճանաչի «շինծու հանրաքվեները, որոնք Ռուսաստանն օգտագործում է դա արդարացնելու համար»։

-Առաջնորդները կոչ են արել բոլոր երկրներին անվերապահորեն մերժել միջազգային իրավունքի խախտումները և Ռուսաստանից պահանջել դադարեցնել ռազմական գործողությունները և անհապաղ, ամբողջությամբ և անվերապահորեն դուրս բերել իր ողջ ուժերն ու զինտեխնիկան Ուկրաինայի տարածքից։

-G7-ն աջակցում է Ուկրաինայի ամբողջականությանը, հաստատում է նրա իրավունքը՝ պաշտպանելու միջազգային հանրության կողմից ճանաչված տարածքը «համաձայն միջազգային իրավունքի, մասնավորապես՝ ՄԱԿ-ի կանոնադրության» և «վերականգնելու դրա նկատմամբ լիակատար վերահսկողությունը»։

-G7-ը մտադիր է շարունակել Կիևին տրամադրել ֆինանսական, հումանիտար և ռազմական աջակցություն «այնքան ժամանակ, որքան դա կպահանջվի», ինչպես նաև պատրաստ է օգնել Կիևին պատրաստվել ձմռանը։

-Ղեկավարները կարծում են, որ Ուկրաինայում խաղաղ կարգավորումը պետք է ներառի երկրի վերակառուցումը, այդ թվում՝ Ռուսաստանի միջոցներով։

-Յոթնյակի խմբի անդամները վստահեցրել են, որ «հետպատերազմյան խաղաղ կարգավորման նպատակով մենք պատրաստ ենք համաձայնություններ ձեռք բերել շահագրգիռ երկրների ու կառույցների և Ուկրաինայի հետ»: Այս համաձայնագրերը վերաբերում են «անվտանգության կայուն պարտավորություններին», ինչպես նաև երաշխիքներին, որ «Ուկրաինան կկարողանա պաշտպանել իրեն, ապահովել ազատ և ժողովրդավարական ապագա և զսպել ապագա ռուսական ագրեսիան»:

-Յոթնյակը հայտարարեց «հանցագործությունների համար Ռուսաստանին պատասխանատվության ենթարկելու» անհրաժեշտության մասին։

-«Մեծ յոթնյակի» երկրները կոչ են արել Մինսկին դադարեցնել աջակցությունը Մոսկվային Ուկրաինայում հատուկ գործողության անցկացման հարցում։

-Ղեկավարները զգուշացրել են, որ Ուկրաինայում քիմիական, կենսաբանական կամ ատոմային զենքի կիրառումը լուրջ հետևանքներ կունենա։

-«Մեծ յոթնյակը» խորը մտահոգություն է հայտնել «Հյուսիսային հոսք» և «Հյուսիսային հոսք 2» խողովակաշարերին հասցված կանխամտածված վնասների կապակցությամբ՝ նշելով, որ նրանք խստորեն դատապարտում են կարևորագույն ենթակառուցվածքների ցանկացած միտումնավոր ոչնչացում և ողջունում են շարունակվող հետաքննությունները:

-Հայտարարության մեջ ընդգծվում է, որ երկրները «կգործեն սերտորեն համակարգված՝ վերացնելու համար ռուսական ագրեսիայի բացասական ազդեցությունը համաշխարհային տնտեսական կայունության վրա, այդ թվում՝ շարունակելով համագործակցությունը G7-ի երկրներում և դրանից դուրս էներգետիկ անվտանգության և մատչելիության ապահովման համար»:

-G7 երկրները հայտարարեցին, որ իրենք աջակցում են ՄԱԳԱՏԷ-ի գործողություններին՝ ուղղված Զապորոժիեի ԱԷԿ-ի անվտանգ շահագործումն ապահովելուն, ինչպես նաև դատապարտում են Ռուսաստանի գործողությունները ԶԱԷԿ-ում և ճնշումը, որը գործադրվում է նրա աշխատակիցների վրա։ Սա «իրավիճակի հետագա անպատասխանատու սրացում» է, և երկրները մտադիր են Ռուսաստանին պատասխանատվության ենթարկել նրա գործողությունների հետևանքով ծագած ցանկացած միջադեպի համար։

Ուկրաինայի նախագահ Վլադիմիր Զելենսկին G7-ի երկրների ղեկավարների հետ առցանց խորհրդակցության ժամանակ կրկին ասել է, որ չի բանակցելու Ռուսաստանի առաջնորդ Վլադիմիր Պուտինի հետ։