«Եթե ոչ հիմա, ապա ե՞րբ». ԵԽԽՎ նախագահը Հայաստանին ու Ադրբեջանին կոչ է արել բովանդակալից երկխոսություն հաստատել

Եվրոպայի Խորհրդի խոհրդարանական վեհաժողովի նախագահ Թինի Կոքսը աշնանային նստաշրջանի ժամանակ անդրադարձել է Հայաստանի Հանրապետության դեմ Ադրբեջանի վերջին ռազմական գործողություններին՝ կոչ անելով կողմերին կրկնապատկել ջանքերը հակամարտության խաղաղ ու կայուն լուծում գտնելու համար։

«Շատ կարևոր մարտահրավերներ կան Եվրոպայում, դրանցից մեկը Հայաստանի և Ադրբեջանի միջև ռազմական գործողությունների վերջին ամենաանհանգստացնող էսկալացիան է, որի հետևանքով երկու կողմն էլ զոհեր ունեն։

Ես կոչ եմ անում երկու երկրներին կրկնապատկել իրենց ջանքերը հակամարտության խաղաղ ու կայուն լուծում գտնելու համար։ Կոչ եմ անում հայ և ադրբեջանցի խորհրդարանականներին օգտագործել այս վեհաժողովը՝ քննարկելու ամենաբարդ հարցերը և բովանդակալից երկխոսություն հաստատել՝ փորձելով կամրջել տարաձայնությունները: Եթե ոչ հիմա, ապա ե՞րբ», - հայտարարել է ԵԽԽՎ նախագահը։

Հիշեցնենք՝ 2022 թվականի սեպտեմբերի 12-ի լույս 13-ի գիշերը Ադրբեջանի զինված ուժերը լայնածավալ ագրեսիա են սկսել Հայաստանի Հանրապետության ինքնիշխան տարածքի նկատմամբ՝ խոշոր տրամաչափի զինատեսակների, հրետանու, հրթիռային համակարգերի, անօդաչու թռչող սարքերի կիրառմամբ:

Ադրբեջանի ագրեսիայի հետևանքով զոհվածների և անհետ կորածների թիվը հասնում է 207-ի, այդ թվում՝ զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող: