Եթե Պուտինը միջուկային հարված հասցնի Ուկրաինային, Ռուսաստանը կարող է հաղթել պատերազմում․ National Interest

Եթե Ուկրաինան եւ Արեւմուտքը շարունակեն էսկալացիան, Պուտինն ի պատասխան՝ կանի այն, ինչի մասին բազմիցս զգուշացրել է՝ միջուկային զենք կկիրառի, գրում է National Interest-ը։

«Անկախ այն բանից, թե կկիրառվի արդյոք այն Ուկրաինայում կոնկրետ թիրախի դեմ, թե ցուցադրական կրակոց կլինի, հետեւանքները նույնն են լինելու։ Նման քայլն, անշուշտ, կխափանի Կիեւին Արեւմուտքի աջակցությունը, հաշվի առնելով, որ ԱՄՆ-ը եւ ՆԱՏՕ-ն գրեթե անկասկած նույն կերպ չեն պատասխանի: Դա կարող է հանգեցնել նաեւ ՆԱՏՕ-ի դաշինքի փլուզմանը։ Ըստ էության, Պուտինը կարող է հաղթել՝ պարտվելով։

Արեւմտյան առաջնորդները եւ պաշտպանության ոլորտի փորձագետները վաղուց են մտածում այն հնարավորության մասին, որ եթե Ուկրաինայի դեմ սովորական արշավը ձախողվի, Մոսկվան կդիմի միջուկային զենքի կիրառմանը: Այժմ այս հնարավորությունը գրեթե կասկած չի առաջացնում։

Ռուսական միջուկային դոկտրինը հստակ հայտարարում է, որ միջուկային զենքի կիրառումը հնարավոր է գոյաբանական սպառնալիքի դեպքում։ Պուտինն իր ելույթում ձեւակերպել է նման գոյաբանական սպառնալիք՝ հայտարարելով մասնակի մոբիլիզացիա։ Նա կրկնել է իր պնդումը, որ Ուկրաինային աջակցելու Արեւմուտքի նպատակը Ռուսաստանին ոչնչացնելն է։ Պուտինը հասկացրել է, որ Մոսկվային թույլատրվում է միջուկային զենք օգտագործել երկրի տարածքային ամբողջականությունը պաշտպանելու համար, որն այժմ կներառի Ուկրաինայի գրավված հատվածները:

Ի՞նչ կանեն ՆԱՏՕ-ն եւ Արեւմուտքը, եթե Ռուսաստանը միջուկային զենքով պատասխանի Ուկրաինայի հաջող հարձակմանը: Գրեթե հաստատ ՆԱՏՕ-ն չի պատասխանի համարժեք միջուկային հարվածով։ Յուրաքանչյուր ոք, ով մասնակցել է ԱՄՆ-ի կամ ՆԱՏՕ-ի բարձր մակարդակի պատերազմական խաղերին վերջին մի քանի տասնամյակների ընթացքում, որտեղ նման սցենար է տեղի ունեցել, եկել է այն եզրակացության, որ չափազանց դժվար է նման արձագանք ստանալ Վաշինգտոնից, էլ չասած ՆԱՏՕ-ից, նույնիսկ եթե նման հարձակման թիրախը ԱՄՆ ուժերն են կամ ՆԱՏՕ-ն։

Եթե հարձակումը զանգվածային չէ, ԱՄՆ կառավարությունը եւ ՆԱՏՕ-ի երկրները ներկայացնող խմբերը գրեթե միշտ ընտրում են ինտենսիվ արշավը՝ սովորական սպառազինությունների կիրառմամբ, կամ նահանջում են։

Եթե Պուտինը միջուկային զենք օգտագործի Ուկրաինայի դեմ, Արեւմուտքի հնարավորություններն էլ ավելի սահմանափակ կլինեն։ Ուկրաինան ՆԱՏՕ-ի անդամ չէ եւ պաշտպանված չէ դաշինքի միջուկային հովանոցով։ Արեւմտյան առաջնորդների համար անընդունելի կլիներ միջուկային զենքով պատասխանելը: Ինչպես ասել է ԱՄՆ նախկին փորձառու պաշտոնյան եւ միջուկային զենքի վերահսկման բանակցությունների մասնակիցը այն մասին, թե ինչպես Վաշինգտոնը կարձագանքի ռուսական միջուկային հարվածին. «Ես չեմ հավատում, որ Միացյալ Նահանգները գնան էսկալացիայի։ Իհարկե, նրանք միջուկային զենքով չեն պատասխանի»: Գրազ գանք՝ Պուտինը գիտի դա։

Արեւմտյան առաջնորդները, առաջին հերթին ԱՄՆ նախագահ Ջո Բայդենը, խոստացել են պատասխանել Ռուսաստանի կողմից միջուկային զենքի կիրառմանը`կրկնապատկելով իրենց օգնությունը Ուկրաինային, ավելի շատ սովորական սպառազինություն եւ ավելի կատարելագործված սպառազինություն տրամադրելով, ընդլայնելով Ռուսաստանի դեմ տնտեսական պատժամիջոցները եւ փորձելով ստանալ միջազգային հանրության աջակցությունը Ռուսաստանը մերժված պետություն դարձնելու համար։ Ըստ Էության, Արեւմուտքը կձգտի շարունակել հենց այն ռազմավարությունը, որը առաջին հերթին կարող է հանգեցնել Պուտինի կողմից միջուկային զենքի կիրառմանը: Սա է խելահեղության սահմանումը՝ նույն բանը նորից ու նորից անել՝ այլ արդյունք ակնկալելով:

Ուկրաինային արեւմտյան լրացուցիչ ռազմական տեխնիկա, ներառյալ լրացուցիչ HIMARS հրթիռներ, մեծ հեռահարության հրթիռներ, ժամանակակից անօդաչու սարքեր, ծանր զրահատեխնիկա եւ նույնիսկ F-16 կործանիչներ տրամադրելը, կերաշխավորի, որ Ուկրաինան կարողանա զսպել ռուսական բանակին: Բայց սա վերջ չի դնի պատերազմին։

Փաստորեն, Արեւմուտքի հավանական պատասխանը ձեռնտու կլինի Պուտինին: Միջուկային զենքի նրա սկզբնական օգտագործումը կարժանանա ոչ այնքան համաչափ պատասխանի՝ ցույց տալով Արեւմուտքի թուլությունը: Մոսկվան կմարսի միջուկային զենքի կիրառումը, կապացուցի, որ զսպումն անիմաստ է, եւ ապագայում միջուկային զենքը կրկին օգտագործելու իրավունք կստանա։ Պուտինի դիրքերը տանը, անշուշտ, կբարելավվեն։ Նա կհավակնի ինքը Ռուսաստանի առաջնորդի դերին, որը հանդես է եկել Արեւմուտքի դեմ եւ խուսափել է պատժից՝ Ռուսաստանը պաշտպանելու համար միջուկային զենք կիրառելով:

Պուտինը կարծում է, որ պատերազմն Ուկրաինայում անհրաժեշտ է, որպեսզի վերանա Ռուսաստանի դեմ գոյաբանական սպառնալիքը, որը ներկայացնում է ՆԱՏՕ-ի ընդլայնումը եւ Ուկրաինայում հաճախորդ-պետություն ստեղծելու նրա ջանքերը: Այս համատեքստում միջուկային զենքի կիրառումն արդարացված է։ Ինչպես նաեւ արեւմտյան էսկալացիայի ռիսկը։ Ինչպես Պուտինը հայտարարել է 2018 թվականին տված հարցազրույցում, միջուկային զենքն առաջինը կիրառելն իմաստ ունի, նույնիսկ եթե դա հանգեցնի համաշխարհային աղետի։ «Ինչի՞ համար է աշխարհը, եթե այնտեղ Ռուսաստան չկա»։ Հայրենիքը պաշտպանելու համար ծայրահեղության գնալու պատրաստ առաջնորդը Ռուսաստանում խոր հարգանք կառաջացնի, ավելի ճիշտ՝ վախ։ Դա պետք է բավական լինի Պուտինին»։