Իրավիճակը հայ-ադրբեջանական սահմանին շարունակում է խիստ մտահոգիչ մնալ. ԱՄՆ պետդեպ

Իրավիճակը հայ-ադրբեջանական սահմանին շարունակում է մնալ խիստ մտահոգիչ: Այս մասին հայտարարել է ԱՄՆ պետքարտուղարության մամուլի խոսնակ Նեդ Փրայսը ճեպազրույցում։

«Մենք խորապես մտահոգված ենք հայ-ադրբեջանական սահմանի երկայնքով շարունակվող հարձակումներով: Մեզ հատկապես անհանգստացնում են Հայաստանի ներսում խաղաղ բնակչության տուժելու վերաբերյալ շարունակական հաղորդումները: Ինչպես գիտեք, պետքարտուղար Բլինկենը, այս շաբաթվա սկզբին ռազմական գործողությունների սկսվելուց անմիջապես հետո, հնարավորություն է ունեցել մեկ գիշերում խոսել Հայաստանի և Ադրբեջանի ղեկավարների հետ: Նա փոխանցել է մեր խորը մտահոգությունն իրենց ընդհանուր սահմանի երկայնքով ռազմական գործողությունների, այդ թվում՝ Հայաստանի ներսում գնդակոծությունների մասին հաղորդումների վերաբերյալ։ Նա կոչ է արել նախագահ Ալիևին անհապաղ դադարեցնել ռազմական գործողությունները, դուրս բերել ռազմական ուժերը, հետ քաշել ուժերը սահմանից և դադարեցնել ռազմական գործողությունները, որոնք կարող են վտանգել խաղաղ բնակչությանը, և աշխատել Հայաստանի և Ադրբեջանի միջև առկա բոլոր խնդիրները լուծել խաղաղ բանակցությունների միջոցով:

Մենք երկու երկրների պաշտոնյաներին, տարածաշրջանի պաշտոնյաներին հասկացրել ենք, նաև հրապարակայնորեն ասել ենք, որ պատրաստ ենք ինչպես երկկողմ, այնպես էլ բազմակողմ համագործակցության ցանկացած ձևով։ Դա կառուցողական կլինի այս բռնությանը անհապաղ վերջ դնելու և լարվածության թուլացման համար»,- ասել է Նեդ Փրայսը: