Այս սարսափելի գործողությունները Ադրբեջանի պատերազմական հանցագործությունների անպատժելիության հետևանք են և արտացոլում են նրա ցեղասպան քաղաքականությունը․ Բարոնուհի Քերոլայն Քոքս

Մեծ Բրիտանիայի և Հյուսիսային Իռլանդիայի Միացյալ թագավորության խորհրդարանի Լորդերի պալատի անդամ բարոնուհի Քերոլայն Քոքսն անդրադարձել է Հայաստանի ուղղությամբ ադրբեջանական ուժերի հարձակմանը՝ շեշտելով, որ միջազգային հանրությունը պետք է դատապարտի Ադրբեջանին և պատասխանատվության ենթարկի պատերազմական հանցագործությունների և մարդկության դեմ հանցագործությունների համար:

Բարոնուհի Քերոլայն Քոքսն իր հայտարարությունում ընդգծել է, որ Ադրբեջանը նոր դաժան հարձակումներ է սկսել Հայաստանի ինքնիշխան տարածքի վրա:

«Ադրբեջանը ոչ միայն հարվածներ է հասցնում ռազմական օբյեկտներին, այլ նաև՝ համայնքներին, քաղաքացիական ենթակառուցվածքներին»,-նշել է Քոքսը:

Հիշատակելով ՀՀ ՊՆ հաղորդագրությունն առ այն, որ սեպտեմբերի 13-ին ժամը 00:05-ին ադրբեջանական զինուժը սկսել է հայկական դիրքերի ինտենսիվ գնդակոծությունը՝ հրետանային և խոշոր տրամաչափի հրաձգային զինատեսակներից՝ նաև ԱԹՍ-ների կիրառմամբ, բարոնուհի Քերոլայն Քոքսը նշել է․

«Այս սարսափելի գործողությունները հետևել են Ադրբեջանի պատերազմական հանցագործությունների անպատժելիությանը և արտացոլում են նրա ցեղասպան քաղաքականությունը»։

Քերոլայն Քոքսն ընդգծել է՝ հասկանալի է, որ Ադրբեջանը խաղաղության մտադրություն չունի:

«Հրատապ անհրաժեշտություն կա, որ միջազգային հանրությունը, այդ թվում՝ Մեծ Բրիտանիան, դատապարտի Ադրբեջանին և պատասխանատվության ենթարկի պատերազմական հանցագործությունների և մարդկության դեմ հանցագործությունների համար»,-շեշտել է նա: