Գիտնականները հայտնաբերել են Հյուսիսային Ամերիկայի ամենահազվագյուտ օձի դիակը, որը սատկել է անսպասելի պատճառով
Ֆլորիդայի ձկների և վայրի բնության գիտահետազոտական ինստիտուտի կենսաբանները պարզել են Հյուսիսային Ամերիկայի ամենահազվագյուտ օձի մահվան պատճառը, որը հայտնաբերվել է Ֆլորիդայի ազգային պարկում: Պարզվել է, որ այն սատկել է շնչահեղձությունից՝ փորձելով կուլ տալ թունավոր հարյուրոտանու: Գտածոյի մասին հաղորդվում է Ecology ամսագրում:
Անորսալի թագադրված քարե օձը (Tantilla oolitica) իր կյանքի մեծ մասն անցկացնում է գետնի տակ՝ թաքնվելով ճեղքերում կամ մտնելով ժայռերի տակ։ Հայտնի է միայն մոտ 26 առանձնյակի գոյության մասին. նրանց բնակության տարածքը նվազել է 98%-ով` նահանգի ուրբանիզացիայի պատճառով: Մինչեւ վերջերս ոչ ոք նույնիսկ չգիտեր, թե ինչ է ուտում այս տեսակը: 2018 թվականից ի վեր ոչ ոք չի տեսել ոչ կենդանի, ոչ մեռած քարե օձեր։
Բայց 2022 թվականին Ջոն Փենեկեմփի անվան պարկի այցելուն արահետով քայլելիս հանդիպել է սատկած օձին: Կենդանին սատկել է՝ փորձելով ուտել որսը՝ հսկա հարյուրոտանու (Scolopendra alternans): Թագադրված օձերի այլ տեսակներ նույնպես ուտում են հսկա հարյուրոտանիներ և այլ պոտենցիալ վտանգավոր զոհեր, ներառյալ կարիճներ: Հայտնաբերված օձի երկարությունը 20 սանտիմետրից մի փոքր ավելի է եղել։ Նա կարողացել է կուլ տալ որսից մոտ 50 միլիմետր, և մինչև ամբողջությամբ կուլ տալը դեռ 23 միլիմետր հարյուրոտանի էր մնացել: Համակարգչային տոմոգրաֆիան, որն առաջին անգամ իրականացվել է այս տեսակի վրա, ցույց է տվել, որ գիշատչի շնչափողը սեղմված է: Օձի վրա հայտնաբերվել է նաև հարյուրոտանու թունավոր ճանկերից վերք։ Բայց ազդեցությունը, թվում է, հանգեցրել է միայն աննշան արյունահոսության, այլ ոչ թունավորման:
1975 թվականից ի վեր թագադրված քարե օձը ներառվել է վտանգվածների ցանկում: Հետազոտությունը թույլ է տվել ավելի լավ հասկանալ հազվագյուտ տեսակի կենսակերպը, իսկ ապագայում կօգնի մշակել այն պաշտպանելու միջոցառումները։