Ո՞ւմ վրա պետք է ազդի Փիլոյանը, եթե նրա դեմ ցուցմունք գրող չկա. «Հրապարակ»

Այս տարվա մարտի 30-ին Հակակոռուպցիոն կոմիտեում քննվող քրեական գործի շրջանակներում ձերբակալվեց արտակարգ իրավիճակների նախարար, գեներալ, ՀՀ ազգային հերոս Անդրանիկ Փիլոյանը։ Դրանից երկու օր առաջ՝ մարտի 28-ին, ՀԿ-ում քննվող քրեական գործի շրջանակներում ԱԱԾ-ն խուզարկություն էր իրականացրել ԱԻՆ-ում, ընդ որում՝ թիրախում եղել էր նախարարի խորհրդականի աշխատասենյակը։ Ապա Հակակոռուպցիոն կոմիտեն պաշտոնապես հայտնեց, որ արտակարգ իրավիճակների նախարար Ա. Փիլոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 3-րդ մասի 3-րդ կետով (3 դրվագ)՝ խոշոր չափերով կաշառք ստանալու համար: Քննիչի որոշմամբ, նա 30.03.2022թ. ձերբակալվեց: Նույն օրը միջնորդություն ներկայացվեց Երեւանի ընդհանուր իրավասության դատարան՝ նրա նկատմամբ կալանավորումը որպես խափանման միջոց ընտրելու համար, եւ նա մինչ օրս կալանավորված է։

Եվս 8 անձի, այդ թվում` ԱԻՆ տարբեր պաշտոնյաների, մեղադրանք առաջադրվեց ՀՀ 38-311-րդ, 3112-րդ, 313-րդ, 178-րդ, 38-308-րդ եւ 34-308-րդ հոդվածների տարբեր մասերով: Հետագայում մեղադրյալների թիվն ավելացել էր՝ հասնելով 20-ի։ Ապա՝ հուլիսին, նախաքննական մարմինը որոշել է առաջադրված մեղադրանքին ավելացնել եւս մեկ դրվագ՝ ՀՀ ՔՕ 256-րդ հոդվածը (վստահված գույքը հափշտակելը), սակայն դատարանը մերժել է այդ միջնորդությունը՝ համարելով, որ հիմնավոր կասկածը բացակայում է:

Փիլոյանի կալանավորման հաջորդ օրը կառավարության նիստում անդրադառնալով կատարվածին՝ վարչապետ Նիկոլ Փաշինյանն ասել է․ «Տեղյակ եք, որ այս շաբաթ՝ կարծեմ 2 օր կամ 3 օր առաջ, իրավապահ մարմինները խուզարկություններ են իրականացրել արտակարգ իրավիճակների նախարարությունում՝ հարուցված քրեական գործի շրջանակներում, որը քննվում է Հակակոռուպցիոն կոմիտեում: Այս պահի դրությամբ այդ գործով կան ձերբակալված անձինք, նաեւ ձերբակալված է արտակարգ իրավիճակների նախարար Անդրանիկ Փիլոյանը: Ես սա ցավով եմ ասում, շատ ցավալի փաստ է: Մենք, իհարկե, որեւէ մեկի անմեղության կանխավարկածը չհարգելու իրավունք չունենք որեւէ կերպ եւ ամենայն հարգանքով: Բայց ես նաեւ ուզում եմ արձանագրել, իմ վերաբերմունքն արտահայտել, որ մենք հանրայնորեն ստանձնել ենք զրո հանդուրժողականություն կոռուպցիայի նկատմամբ: Շատ կարեւոր է, որ մենք այդ դիրքորոշումը հետեւողականորեն եւ սկզբունքային պահենք, ինչը դեռեւս որեւէ բան չի նշանակում, դեռ պետք է տեղի ունենա նախաքննություն, պետք է ի վերջո գործը գնա դատարան, եւ միայն դատարանի օրինական ուժի մեջ մտած դատավճռով կամ դրանից հետո կարելի կլինի որեւէ եզրակացություն անել։ Հաճելի չէ այս իրավիճակը, բայց կարծում եմ՝ հանրության առաջ ստանձնած պարտավորությունները, օրենքի գերակայությունը, օրենքի առաջ բոլորի հավասարությունը շատ ավելի կարեւոր է: Համոզված եմ, որ նախաքննությունը կընթանա օբյեկտիվ՝ օրինականության տառին եւ ոգուն համապատասխան, եւ բոլոր մեղավորները կստանան օրենքով նախատեսված պատիժ, եթե կպարզվի կամ կապացուցվի նրանց մեղավորությունը»:

Եվ ոչ ոք հարց չհնչեցրեց, թե՝ եթե սպասում եք, որ գործը քննվի, եւ դատարանն էլ որոշի մարդու մեղավորությունը, այդ դեպքում ինչո՞ւ եք կալանավորում մարդուն։ Էլի քննեք, էլի պարզեք, բայց մարդու ազատության պայմաններում։ Եվ ահա, արդեն 5 ամիս է՝ քննում են ու քննում, իսկ գեներալն ու ազգային հերոսը ԱԱԾ մեկուսարանում նստած է։ 

Նախօրեին դատական նիստ է կայացել ՀՀ արտակարգ իրավիճակների նախկին նախարար Անդրանիկ Փիլոյանի գործով: Գեներալի կալանքի ժամկետը մեկ ամսով երկարաձգվել է: Հիմքը նույնն է, ինչ կալանավորման պահին՝ գործի քննությանը խոչընդոտելու հավանականությունը: Անդրանիկ Փիլոյանի պաշտպան Տիգրան Սարգսյանն այժմ հատուկ վերանայման կարգով վերաքննիչ բողոք է գրում՝ կալանքը երկարաձգելու որոշման դեմ: Նա վստահեցնում է՝ իր պաշտպանյալը չի կարող ազդել որեւէ մեկի գործողությունների վրա՝ այդպիսով խոչընդոտելով գործի քննությանը, քանի որ գործի նյութերում ներկայացված են միայն օպերատիվ-հետախուզական միջոցառումների արդյունքներ, եւ չկան անձինք, ում վրա Փիլոյանը կարող է ազդել, որովհետեւ նրա դեմ ցուցմունք գրող էլ չի եղել:

«Չկան մարդիկ, որոնք իմ պաշտպանյալի դեմ ցուցմունքներ գրած լինեն»,- ասում է փաստաբանը: Հիշեցնենք․ Անդրանիկ Փիլոյանը մեղադրանքը չի ընդունում: Գործը սկսվել էր մեծ աղմուկով՝ «մասկի շոուով», մեծ «շուխուրով»։ Տպավորություն էր, թե ԱԻՆ-ում մեծ հանցավոր խումբ է գործել, որն ինչ ուզել, արել է՝ կաշառքներ է ստացել, փողեր «կպցրել», պարգեւատրումներ հափշտակել, մրցույթների արդյունքներ «դասավորել» եւ այլն: Ամենացնցողը գեներալ Փիլոյանի կողմից որպես կաշառք ստացած «բաքսիի» մասին լուրն էր: «Բաքսին» կպավ գեներալ Փիլոյանին, ինչպես «տուշոնկան»՝ Մանվել Գրիգորյանին, եւ վարկաբեկեց նրան։ Աղմուկն արագ լռեց, հետագայում կարող է պարզվել, որ մեղադրանքն էլ անհիմն էր, ուռճացված, կամ ուրիշի մեղքն այլ մարդու են վերագրել, բայց խարանը, ինչպես ասում են, կպավ, ու այլեւս մարդը դրանից չի մաքրվի: Իսկ ապացույցներ, եթե հավատանք Փիլոյանի փաստաբանին, կարծես թե չկան:

Ինչպե՞ս է իրեն զգում Անդրանիկ Փիլոյանը: Տիգրան Սարգսյանը վստահեցնում է՝ «նա ամուր մարդ է, ճիշտ է գնահատում ստեղծված իրավիճակը, գուցե, ենթատեքստով, բայց չի ասում այդ մասին»:

- Ի՞նչ եք գրում վերաքննիչ բողոքում:

- Ես գրում եմ, որ՝ հարգելի դատարան, եթե իմ պաշտպանյալն ազատության մեջ գտնվի, ապա նա խելագարի նման՝ թող ինձ ների Անդրանիկ Փիլոյանը, գնալու է իր օգտին ցուցմունք տված անձանց խնդրի, ասի՝ գնացեք, իմ դեմ ցուցմունք տվեք: Մարդն ասում է՝ ես կաշառք չեմ տվել, Անդրանիկը գնալու է, ասի՝ այ տղա, գնա ասա՝ կաշառք եմ տվել: Սա՞ է ազդեցությունը: Ո՞ւմ վրա պետք է ազդի Փիլոյանը, եթե նրա դեմ չկա ցուցմունք գրող: Ծիծաղելի է, չէ՞: Ինձ համար ծիծաղելի չէ ընդհանրապես: 

- Բա ի՞նչ են այդքան գրել՝ կաշառքներ, ՍՊԸ-ի համար գործ դասավորել, պարգեւավճարների յուրացում եւ այլն: Ապացույցները որո՞նք են: 

- Օպերատիվ ճանապարհով ձեռք բերված տվյալներից արված ենթադրություններ են դրանք:

- Դուք ասել էիք, որ ինչ-որ անձինք ցուցմունք են տվել գործով՝ զգուշանալով, որ կկալանավորվեն: Հիմա ասում եք՝ չկա ցուցմունք տվող: 

- Ես այդպես չեմ ասել: Ասել եմ ու հիմա էլ գրում եմ իմ բողոքում, որ ցուցմունքները, եթե այդպիսիք կան, ապա այդ մարդկանց ազատության գինն է դա, բայց այդպիսիք չկան:

ԱՂԲՅՈՒՐԸ