ՄԱԿ-ը ներկայացրել է 2020-2021 թթ. ԼՂ հակամարտությանը Միջգործակալական արձագանքման ծրագրի վերջնական հաշվետվությունը

ՄԱԿ-ը ներկայացրել է 2020 թ. հոկտեմբերից մինչեւ 2021 թ. դեկտեմբեր ընկած ժամանակահատվածում Լեռնային Ղարաբաղի հակամարտությանը Միջգործակալական արձագանքման ծրագրի վերջնական հաշվետվությունը: Այս մասին հայտնում են ՄԱԿ-ի հայաստանյան գրասենյակից։

Գրասենյակից նշում են, որ ավելի քան 40,4 միլիոն ԱՄՆ դոլար է հավաքագրվել եւ հատկացվել Միջգործակալական արձագանքման ծրագրի միջոցառումների իրականացմանը, որոնք համակողմանիորեն անդրադարձել են Լեռնային Ղարաբաղից (ԼՂ) եւ դրա շրջակայքից հակամարտության սրման հետեւանքով Հայաստան ժամանած 90,000 մարդու կարիքների բավարարմանը:

Որպես միջգերատեսչական արձագանքման համակարգողներ՝ ՄԱԿ-ի մշտական համակարգողի գրասենյակը եւ ՄԱԿ ՓԳՀ-ն՝ ՄԱԿ-ի Փախստականների գործակալությունը, Հայաստանում ՄԱԿ-ի թիմի, գործընկերների եւ ՀՀ կառավարության ներկայացուցիչների հետ միասին ներկայացրել են 2021 թվականի Հայաստանի Միջգործակալական արձագանքման ծրագրի կատարման վերջնական հաշվետվությունը:

Նշվում է, որ Լեռնային Ղարաբաղի հակամարտության սկզբից եւեթ ՄԱԿ-ը եւ գործընկերները նախաձեռնել են Միջգործակալական արձագանքման ծրագիրը, որպեսզի լրացնեն ՀՀ կառավարության ջանքերը Լեռնային Ղարաբաղից եւ դրա շրջակայքից Հայաստանում ապաստանած 90,000 մարդու (որոնց 88 տոկոսը կանայք եւ երեխաներ են) մարդասիրական օգնություն, ներառյալ կացարան, բժշկական ծառայություններ, պարենամթերք, դրամական միջոցներ եւ պաշտպանական աջակցություն տրամադրելու ուղղությամբ։

Միջգործակալական արձագանքման ծրագրի գործընկերները համակարգել են ջանքերը հինգ մարդասիրական թեմատիկ աշխատանքային խմբերի շրջանակներում եւ սերտ համագործակցել պետական եւ տեղական իշխանությունների, ներառյալ մարզպետարանների, ինչպես նաեւ այլ շահագրգիռ կողմերի հետ:

Պաշտոնական մեկնարկի ժամանակ վերջնական հաշվետվության մեջ արձանագրված արդյունքներն ու ձեռքբերումները ներկայացվել են ինչպես Կառավարությանն, այնպես էլ գործընկերներին, այդ թվում՝ ՄԱԿ-ի գործակալություններին, միջազգային եւ ազգային ՀԿ-ներին, միջկառավարական կազմակերպություններին, պետական կառույցներին եւ միջազգային կազմակերպություններին:

Իր ողջույնի խոսքում ՀՀ ԱԳ նախարարի տեղակալ Վահե Գեւորգյանը բարձր է գնահատել միջգործակալական արձագանքման ծրագրի շրջանակներում ՄԱԿ-ի հայաստանյան գրասենյակի եւ բոլոր գործընկերների հետ արդյունավետ համագործակցությունը եւ կատարված աշխատանքը:

«Մարդասիրական եւ զարգացման գործընկերները ՄԱԿ-ի հայաստանյան գրասենյակի հետ միասին կարեւոր փոփոխություն են բերել տեղահանվածների կյանքում. մասնավորապես 71,218 անձ օգտվել է տարրական օգնությունից, 45,745 անձ՝ սեզոնային ապրանքներից, 26,730 անձ/6,051 տնային տնտեսություն ներգրավվել է պաշտպանական մշտադիտարկման միջոցով, 8,383 երեխա եւ դեռահաս ներգրավվել է տարբեր միջոցառումների շրջանակներում՝ հնարավորություն ստանալով լավ ուսումնական միջավայր ունենալու եւ այլն: Ծրագիրը եւ դրա իրականացման համակարգումը կարեւոր դեր ունեցան հրատապ աջակցության հավաքագրման համար՝ ընդլայնելով մարդասիրական գործունեության մեջ դոնորների մասնակցությունը»,– նշել է Հայաստանում ՄԱԿ-ի մշտական համակարգողի պաշտոնակատար Լիլա Փիթրս Յահիան։

Աննա-Կարին Օստն իր եզրափակիչ խոսքում նշել է, որ ՄԱԿ-ի Փախստականների գործակալությունը շնորհակալություն է հայտնում դոնոր երկրներին՝ ստանձնած հանձնառության եւ Հայաստանում խոցելի ընտանիքներին տրամադրված աջակցության համար:

«Պետության եւ հասարակական կազմակերպությունների միջեւ արդյունավետ համակարգման ու համագործակցության արդյունքում՝ Հայաստանում ՄԱԿ-ի գործակալությունները առաջնահերթ եւ խիստ կարեւոր աջակցության ծրագիր իրականացրեցին տեղահանված ընտանիքների համար՝ շնորհիվ 2021 թվականին բազմաթիվ դոնորների օժանդակության։ Այն բարելավեց պաշտպանության միջավայրը եւ թեթեւացրեց համայնքների բեռը, որ գրկաբաց ընդունել եւ հոգ են տարել տեղահանված ընտանիքների մասին, մասնավորապես՝ խոցելի կանանց, երեխաների եւ տարեցների»,- ասել է նա:

Դոնորները եւ իրականացնող գործընկերները կիսվել են կարծիքներով եւ գոհունակությամբ արտահայտվել ճգնաժամին նպատակաուղղված արձագանքելու վերաբերյալ։