Ռուսների ավելի քան 65 տոկոսը համաձայն է Ուկրաինայի հետ խաղաղ համաձայնություն կնքելուն

«Shantnews»-ի փոխանցմամբ՝ Ուկրաինայի հետ խաղաղության պայմանագիր կնքելու որոշմանը կողմ է ռուսաստանցիների 65%-ը։ Այս մասին հայտնում է Коммерсант-ի ռուսական հրատարակությունը՝ հղում անելով Ռուսաստանի Դաշտային սոցիոլոգիական ծառայության տվյալներին։ Հարցման համաձայն՝ ռուսաստանցիների 65%-ը հավանություն կտա Վլադիմիր Պուտինի՝ «ռազմական գործողությունը» դադարեցնելու որոշմանը Ուկրաինայում և խաղաղության պայմանագիր ստորագրելուն։

Միևնույն ժամանակ հարցվածների գրեթե 60%-ը նույնպես կպաշտպաներ «Կիևի վրա նոր հարձակում» իրականացնելու Կրեմլի մտադրությունը։

Ընդհանուր առմամբ, հարցվածների 52%-ը կողմ է ռազմական գործողության շարունակմանը, իսկ 38%-ը կողմ է խաղաղ բանակցությունների անցմանը։

Մարտի կեսերից մինչև հուլիսի վերջ ընկած ժամանակահատվածում պատերազմի կողմնակիցների և հակառակորդների հարաբերակցությունը գործնականում չի փոխվել, նշում են հետազոտության հեղինակները։ Այժմ դրան կողմ է հարցվածների 69%-ը, հակառակ կարծիքին է 23%-ը, ևս 8%-ը դժվարացել է կամ հրաժարվել է պատասխանել։

Բացի դրանից, նյութում ասվում է, որ ռուսաստանցիների 59%-ը կարծում է, որ Ուկրաինայում, այսպես կոչված, «հատուկ գործողությունը» ձգձգվել է։ Ընդ որում, հարցման մասնակիցների 28%-ը հակառակ կարծիքն ունի։

Ռուսաստանցիների 30%-ի կարծիքով՝ ռազմական գործողությունները կտևեն մեկ տարուց ավելի, 18%-ն ակնկալում է, որ դրանք կավարտվեն մեկ տարվա ընթացքում, հարցվածների 20%-ը հույս ունի, որ պատերազմը կավարտվի վեց ամսվա ընթացքում, և հարցվածների միայն 13%-ն է լավատեսորեն կարծում, որ ռազմական գործողությունները կավարտվեն մի քանի ամսում.

Ռուս տղամարդկանց մեծամասնությունը՝ 62%-ը, պատրաստ չէ անձամբ մասնակցել Ուկրաինայում ռազմական գործողություններին, եթե հնարավորություն ունենա։ Իսկ հարցվածների 29%-ը պատրաստ է անձամբ մասնակցել «հատուկ գործողությանը»։ Նրանց մեծ մասը 45-ից 59 տարեկան մարդիկ են (37%), մինչդեռ 18-ից 29 տարեկան տղամարդկանց շրջանում՝ ընդամենը 23%:

Բացի դրանից, ռուսների 67%-ը պատրաստ չէ սեփական միջոցները նվիրաբերել պատերազմին աջակցելու համար, իսկ 12%-ը համաձայն է դրա վրա ծախսել ամսական ոչ ավելի, քան հազար ռուբլի։

Ուսումնասիրությունն իրականացվել է հեռախոսային հարցման եղանակով հուլիսի 28-31-ը։ Դրան մասնակցել է 1609 հարցված ութ դաշնային շրջաններում:

Հետազոտության հեղինակները զգուշացնում են, որ դրա արդյունքները մի շարք հարցերի վերաբերյալ, թե ինչ է կատարվում Ուկրաինայում, կարող են չհամապատասխանել իրականությանը՝ «անկեղծության նվազմամբ» պայմանավորված։