Գերմանիայում տնային տնտեսությունների կոմունալ ծախսերը ռեկորդային մակարդակի են հասել

Գազի եւ էլեկտրաէներգիայի համար գերմանական տնային տնտեսությունների վճարները ռեկորդային բարձր մակարդակի են հասել՝ գրեթե երեք անգամ ավել նախորդ տարվա համեմատ, հաղորդում է Reuters-ը՝ վկայակոչելով Verivox-ը:

Աշնանն էլ ավելի շատ խնդիրներ են սպասվում, քանի որ տարածաշրջանային շատ մատակարարներ արդեն հայտարարել են գների բարձրացման մասին, իսկ կառավարությունը ծրագրում է կրճատել ծախսերը՝ ֆինանսապես սահմանափակ ներկրողներին աջակցելու եւ ձմռանը դեֆիցիտի վախի պատճառով պահեստարաններում գազի քանակն ավելացնելու համար։

«Գների պայթյունի վերջը չի երեւում»,- հայտարարել է ընկերությունը, որը վերլուծել է մոտ 700 տեղական կոմունալ ծառայությունների հասանելի սակագները։

Տարեկան 20 000 կիլովատ/ժամ (կՎտժ) օգտագործող տնային տնտեսությունն օգոստոսին միջինում 3.568 եվրո է վճարել, ինչը համարժեք է աննախադեպ 18 ցենտ/կՎտժ-ին եւ 184 տոկոսով ավել է, քան 1.258 եվրոն 2021 թվականի օգոստոսին:

«Գազի մեծածախ գներն այժմ բավականին բարձր են նույնիսկ այդ մակարդակից, ինչը նշանակում է, որ (սպառողական) գինը կտրուկ կբարձրանա»,- ասել է Verivox-ի էներգետիկ փորձագետ Տորստեն Ստորկը:

Գերմանիայի 41.5 միլիոն տնային տնտեսությունների կեսը ջեռուցման համար գազ է օգտագործում։

Կառավարությունը նախատեսում է փոփոխել էներգետիկ անվտանգության մասին օրենքը, որպեսզի աճող ծախսերը տեղափոխվեն բոլոր սպառողների վրա, այդ թվում՝ ֆիքսված գնով պայմանագրեր ունեցողների՝ պատճառաբանելով գազի դե ֆակտո դեֆիցիտի հետ կապված իրավիճակը:

Verivox-ի գնահատականներով՝ հոկտեմբերից պլանավորված հավաքները կարող են ավելացնել ծախսերը 357-ից մինչեւ 1190 եվրո մեկ ընտանիքի համար, ինչի հետեւանքով տարեկան գները չորս անգամ կգերազանցեն նախորդ տարվա օգոստոսի մակարդակը։