Ավստրալիայում կոչ են արել թույլ տալ աշխատակիցներին տնից աշխատել՝ կորոնավիրուսի հերթական ալիքի պատճառով

Ավստրալիայի իշխանությունները ձեռնարկություններին կոչ են արել թույլ տալ աշխատակիցներին տնից աշխատել՝ կորոնավիրուսի հերթական ալիքի պատճառով։ Բացի այդ, խորհուրդ է տրվում փակ տարածքներում դիմակներ կրել եւ շտապ խթանիչ պատվաստումներ կատարել խոշոր բռնկման ֆոնին, հայտնում է Reuters-ը։

Ավստրալիան գտնվում է Omicron-ի երրորդ ալիքի տիրույթում՝ պայմանավորված նոր բարձր փոխանցվող ենթատարբերակներով՝ BA.4 եւ BA.5, ընդ որում, վերջին յոթ օրվա ընթացքում գրանցվել է ավելի քան 300.000 դեպք: Իշխանություններն ասում են, որ իրական թվերը կարող են կրկնակի անգամ շատ լինել:
Վարչապետ Էնթոնի Ալբանեզը դիմադրում է ճնշումներին՝ նպատակ ունենալով վերականգնել կոշտ սահմանափակումները վիրուսի տարածումը դադարեցնելու համար, այդ թվում՝ դիմակների պարտադիր կրումը փակ տարածնքներում:

Ալբանեզն ասել է, որ ձեռնարկությունները եւ աշխատակիցները պետք է միասին տնից աշխատելու որոշում կայացնեն, քանի որ արհմիությունները գործատուներին կոչ են անում ավելին անել իրենց աշխատողների համար:

Իշխանությունները նախազգուշացրել են, որ առաջիկա շաբաթներիմ Ավստրալիայում կարող են «միլիոնավոր» նոր դեպքեր գրանցվել:

Պաշտոնական տվյալների համաձայն, այժմ COVID-19-ով վարակված մոտ 5.350 ավստրալացի գտնվում է հիվանդանոցում: Շատ բուժաշխատողներ եւս հիվանդ կամ մեկուսացված են, ինչը լրացուցիչ բեռ է ստեղծում առողջապահական համակարգի վրա: Ավստրալացի բժիշկներն ասում են, որ դիմակները պետք է պարտադիր դառնան փակ տարածքներում:

Պատվաստանյութի երկու դեղաչափ ստացել է 16 տարեկանից բարձր մարդկանց 95 տոկոսը: