Ի՞նչ է անում պաշտոնը մարդու հետ. «Փաստ»

«Փաստ» օրաթերթը գրում է. «Պատասխանելով լրատվամիջոցներից մեկի լրագրողի հարցին՝ Մարզահամերգային համալիրի տնօրեն Կարեն Ղազարյանն ասել է, թե չի կարող գնահատական տալ, թե պրոդյուսեր Արմեն Գրիգորյանն ում մեղավորությամբ մահացավ դատարանի դահլիճում: Ինչ վերաբերում է քրեական գործին ու կալանավորմանը, Ղազարյանը նորից ասել է. «Ես չեմ կարող իրավական գնահատականներ տալ»:

Կարեն Ղազարյանը Արմեն Գրիգորյանի ընկերն է, ինչպես ինքն է ասում, «շատ երկար տարիների մտերիմ ընկերը»: Սակայն, ինչպես երևում է, պաշտոնն ու իշխանությունների հետ մտերմությունն ավելի թանկ է, քան ընկերությունը, քան մարդկայինը: Ղազարյանն ասում է, թե չի ցանկանում քաղաքականացնել, սակայն ուզի, թե ոչ, Գրիգորյանի մահն ինքնին քաղաքական պատճառներ ունի, քաղաքական պատճառներ ունեն նաև իր «ցրողական» պատասխանները, քանի որ ակտիվորեն համագործակցում է ՔՊ-ի հետ, ավելին՝ ընկերոջ մահվանը հաջորդող րոպեներին իր էջում իշխանահաճո «պոստ» է անում:

Քաղաքական պատճառներ ունի նաև այն, որ նույն Կարեն Ղազարյանը կամ ՈՒՀԱ-ի՝ Արմեն Գրիգորյանի շատ թիմակից-ընկերներ ծպտուն անգամ չհանեցին նրան կալանավորելիս: Կարևորը, որ Կարեն Ղազարյանը առիթը բաց չի թողնում իշխանություններին «լսեցնել», թե ինքը Արմենի «որոշակի դիրքորոշումների հետ՝ քաղաքական առումով, հստակ համաձայն չի եղել»: Բա, պաշտոնն այդպիսի բան է»:

Առավել մանրամասն՝ թերթի այսօրվա համարում: