Կյանքից հեռացել է հայ վաստակաշատ վիրաբույժ, մարդասեր եւ բարերար Գրիգոր Երզնկացյանը

80 տարեկան հասակում կյանքից հեռացել է հայ վաստակաշատ վիրաբույժ, մարդասեր և բարերար Գրիգոր Երզնկացյանը։ Այս մասին հաղորդագրություն է տարածել «Թեքեյան Կենտրոն» հիմնադրամը։

«Անձնուրաց մարդ, ով իր կյանքը նվիրել է բժշկության զարգացմանը, մարդկային կյանքեր փրկելուն՝ հատկապես կարիքավոր համայնքներում անվճար մատուցելով վիրաբուժական ծառայություններ։

«Թեքեյան Կենտրոն» հիմնադրամը խորին ցավակցություն ևզորակցություն է հայտնում Երզնկացյան և Ուզունյան ընտանիքներին, հարազատներին, գործընկերներին և աշակերտներին պրոֆեսոր Գրիգոր Երզնկացյանի մահվան կապակցությամբ: Անդառնալի կորուստ բժշկության, օնկովիրաբուժության և, առհասարակ, Հայաստանի և սփյուռքի մեր հայրենակիցների համար…

Վաստակաշատ պրոֆեսոր Գրիգոր Երզնկացյանն իր կյանքը նվիրել է Արևելյան, Կենտրոնական և Հարավային Աֆրիկայում բժշկության ոլորտի զարգացմանը, վիրաբույժների ուսուցմանը, որակյալ մասնագետներ պատրաստելուն և իր մասնագիտական փորձը նրանց փոխանցելուն:

Ծնվել է Եթովպիայում՝ Հայոց ցեղասպանությունից մազապուրծ եղած հայ ընտանիքում: Վաղ հասակից դաստիարակվել է հայկական ոգով, հայրենասիրությամբ ու սիրով դեպի ազգային մշակույթը, լեզուն, կրոնը և գիտակցել ազգային ինքնության պահպանման կարևորությունը: Միջնակարգ կրթությունը ստացել է Հյուսիսային Ուելսում, իսկ 1963թ. ընդունվել է Իռլանդիայի վիրաբույժների թագավորական քոլեջ: Այս ժամանակահատվածում արժանացել է մի շարք պարգևների և նաև բարձրագույն վիրաբուժական պրակտիկա է անցել Դուբլինի մի քանի հիվանդանոցներում: Անցնելով երկար ու բարդ մասնագիտական ճանապարհ տարբեր երկրներում, պահպանել է ազգայինը և պահել կապը հայրենիքի հետ: Հայությանն ու հայրենիքին վերաբերող բազմաթիվ հրապարակումներով հանդես է եկել սփյուռքի մամուլի էջերում: Գտնվելով Հայաստանից հեռու՝ մշտապես ապրում և շնչում էր հայրենիքով՝ կիսելով նրա վիշտն ու ուրախությունը:

Իռլանդիայում վիրաբուժական փորձառություն ձեռք բերելուց հետո վերադարձել է Աֆրիկա: Այստեղ՝ Զամբիայի մայրաքաղաք Լուսակայում ձևավորվել է իր վիրաբուժական կարիերայի մեծ մասը: Նա զբաղեցրել է մի շարք կարևոր վարչական պաշտոններ, իսկ 1999թ. արժանացել է Զամբիայի համալսարանի վիրաբուժության պրոֆեսորի կոչմանը, նաև եղել է Զամբիայի վիրաբուժական միության նախագահը:

Պրոֆեսոր Երզնկացյանը հեղինակ է աֆրիկյան վիրաբուժության վերաբերյալ մեծ թվով աշխատությունների, որոնցում անդրադառնում է տեղային անզգայացման և կետամինի կարևորության, արյունավարակման և վնասվածքների կանխարգելման, ինչպես նաև Աֆրիկայում քաղցկեղով մեծ թվով հիվանդների բացահայտման հարցերին:

Աֆրիկայում պատշաճ վիրաբուժական համակարգի անհրաժեշտությունը հանգեցրել է Արևելյան, Կենտրոնական և Հարավային Աֆրիկայի վիրաբույժների համալսարանի /ԱԿՀԱՎՀ/ ստեղծմանը, որի շարժիչ ուժն էր պրոֆեսոր Երզնկացյանը: Նա համալսարանի խորհրդի ամենաերկարատև անդամն էր. նաև եղել էր համալսարանի փոխնախագահը, նախագահը և ռեկտորը:

Նրա անսպառ էներգիայի և մեծ նվիրումի շնորհիվ նորաստեղծ համալսարանը ոտքի է կանգնել՝ արձանագրելով բազմաթիվ հաջողություններ ու նվաճումներ: Իր մեծ վաստակի և ներդրումի համար 2012թ. պրոֆեսոր Երզնկացյանն արժանացել է ԱԿՀԱՎՀ պատվավոր անդամի կոչմանը:

2007թ. ԱԿՀԱՎՀ խոստումնալից համագործակցություն է սկսել Իռլանդիայի վիրաբույժների թագավորական քոլեջի հետ, ինչում կրկին մեծ է պրոֆեսոր Երզնկացյանի դերը: Համագործակցության արդյունքում աֆրիկյան վիրաբուժության համակարգը մեծ բարեփոխումներ է ունեցել և համալրվել է նորագույն և ժամանակակից միջոցներով ու սարքավորումներով: Տարածաշրջանում արձանագրվել է նաև ուսանող վիրաբույժների թվի մեծ աճ, ինչպես նաև Զիմբաբվեում, Զամբիայում և Ռուանդայում մեծ թվով թերապևտներ զարգացրել են իրենց գիտելիքները և ծանոթացել հիմնական վիրաբուժական մեթոդներին:

Իր բազմամյա գործունեության և վիրաբուժության ոլորտում մեծ ավանդ ունենալու համար մեծ մարդասեր և բարերար պրոֆեսոր Գրիգոր Երզնկացյանը 2016թ. արժանացել է Իռլանդիայի Վիրաբույժների Թագավորական Քոլեջի բարձրագույն պարգևին՝ պատվավոր անդամի կոչմանը:

1988թ. սկսած պրոֆեսոր Երզնկացյանն ամեն տարի գալիս էր Հայաստան և հատկապես Արցախ՝ վիրաբուժական բարեգործական գործունեություն իրականացնելու:

Մեր արժանավոր և վաստակաշատ հայրենակցի լուսավոր հիշատակը հավերժ կմնա նրան ճանաչող հազարավոր հայրենակիցների և օտարազգիների հիշողության մեջ»,-ասված է հայտարարության մեջ։