Մեծ Բրիտանիայի կրթության նորանշանակ նախարարը միջնամատ է ցույց տվել Բորիս Ջոնսոնի հակառակորդներին

Մեծ Բրիտանիայի խորհրդարանի անդամ, Brexit-ի կողմնակից Անդրեա Ջենքինսը, որը Բորիս Ջոնսոնի հրաժարականից հետո միջնամատ է ցույց տվել նրա հակառակորդներին, նշանակվել է կրթության նախարար, գրում է The Independent-ը։

Ջենքինսը, որը Ջոնսոնի կողմնակիցն է, բղավել է «սպասեք եւ կտեսնենք» այն մարդկանց, որոնք եկել են դիտելու վարչապետի հրաժարականը, եւ իր միտքն ընդգծելու համար բարձրացրել է միջնամատը։

Այժմ, ընդամենը 24 ժամ անց, Ջենքինսը ստացել է կրթության նախարարի պաշտոնը:

«Ինձ համար մեծ պատիվ է ծառայել վարչապետին որպես կրթության հարցերով պետական քարտուղարի խորհրդարանական տեղակալ: Մեր կրթության եւ դաստիարակության համակարգերն օգնում են ձեւավորել հաջորդ սերունդը եւ հիմքեր դնել ապագայի համար»,- գրել է նա Twitter-ում:

Քննադատներն անմիջապես արձագանքել են այս գրառմանը` ասելով, որ «անհամբեր սպասում են, թե երբ նա կսկսի իրենց երեխաներին լավ վարվելաձեւ սովորեցնել», եւ տեղադրելով սքրինշոթեր, որտեղ նորաթուխ կրթության նախարարը միջնամատն է ցույց տալիս: