Գերմանիայի նախագահը Զելենսկուց բացատրություն է պահանջել Կիև այցի չեղարկման համար

Գերմանիայի նախագահ Ֆրանկ-Վալտեր Շտայնմայերը Ուկրաինայի նախագահ Վլադիմիր Զելենսկու հետ հեռախոսազրույցում խնդրել է բացատրել, թե ինչու է ապրիլին չեղարկվել Կիեւ իր այցը։ Կողմերը քննարկել են նաեւ Շտայնմայերի հնարավոր այցը ապագայում, սակայն ամսաթիվը դեռ որոշված չէ։ Այս մասին հայտնել է գերմանական Der Spiegel թերթը՝ հղում անելով աղբյուրներին։

Հրատարակության տվյալներով՝ Գերմանիայի եւ Ուկրաինայի նախագահների զրույցը տեղի է ունեցել մայիսի 5-ին եւ տեւել է 45 րոպե։ Զրույցի ընթացքում ուկրաինական կողմն առաջարկել է Ֆրանկ-Վալտեր Շտայնմայերի այցը կազմակերպել մայիսի 8-ին, սակայն նա հրաժարվել է այն պատճառով, որ Բունդեսթագի նախագահ Բերբել Բասի այցն արդեն նախատեսված է եղել այդ օրը։

Der Spiegel-ը հայտնում է, որ Ուկրաինան Ֆրանկ-Վալտեր Շտայնմայերի ապրիլի 12-ի այցը չեղարկել է նյութատեխնիկական խնդիրների եւ անվտանգության ապահովման դժվարության նկատառումներից ելնելով։ Ուկրաինական կողմը նաեւ համարել է, որ Գերմանիայի նախագահի այցն ավելի «ընդունելի» ու «նշանակալի» կլիներ, եթե դա նա մենակ այցելեր։ Ապրիլին Շտայնմայերը պատրաստվում էր Լեհաստանի, Լատվիայի, Լիտվայի եւ Էստոնիայի նախագահների հետ այցելել Կիեւ։

Ինչպես նշում է թերթը, այցի չեղարկումը լարվածություն է ստեղծել երկու երկրների հարաբերություններում։ Der Spiegel-ի փոխանցմամբ՝ կողմերը քննարկում են ապագայում հնարավոր այցը, սակայն դեռ կոնկրետ ժամկետ չեն ընտրել։

Գերմանիայի նախագահի այցը նախատեսված էր ապրիլի 12-ին, սակայն նույն օրը չեղարկվել էր Ուկրաինայի նախաձեռնությամբ։ Շտայնմայերի խոսքով՝ Կիեւում այցը անցանկալի են համարել, գրում է «Կոմերսանտը»։