Ջոնսոնի հեռանալը մեծ փոփոխություններ չի բերի ԵՄ-ի համար. Վնասն արդեն հասցված է

Թերթային ուռճացված հոդվածներով հակաեվրոպական տրամադրությունների բորբոքման սկզբից մինչեւ Մեծ Բրիտանիան դաշինքից դուրս բերելու պոպուլիստական արշավը եւ Brexit-ից հետո առեւտրային գործարք ստորագրելուց հրաժարվելը Մեծ Բրիտանիայի հեռացող վարչապետ Բորիս Ջոնսոնը Բրյուսելի պատուհասն է եղել տարիներ շարունակ, գրում է AP-ն։

Մեծ Բրիտանիայի եւ ԵՄ-ի միջեւ կապերը խզելու վրա նրա ազդեցությունն այնքան մեծ էր, որ այն բանից հետո, երբ Ջոնսոնը ստիպված եղավ հինգշաբթի օրը հայտարարել իր հրաժարականի մասին, այդ լուրը ուրախություն չառաջացրեց ԵՄ շրջանակներում: Փոխարենը կար միայն անխուսափելիի քարացած ընդունում եւ համակերպում այն փաստի հետ, որ ամեն ինչ այլեւս առաջվանը չի լինի:

«Ես նրան չեմ կարոտի»,- ասել էր Ֆրանսիայի ֆինանսների նախարար Բրունո Լը Մերը՝ ընդգծելով բացահայտ արհամարհանքը, ինչպիսին չի եղել այն բանից հետո, երբ եվրոպացիները ողջունում էին Դոնալդ Թրամփի պարտությունը 2020 թվականի ԱՄՆ ընտրություններում։ Եվ չնայած անդրատլանտյան հարաբերությունները արագ աշխուժացան նախագահ Ջո Բայդենի գալով, բրիտանացի նոր առաջնորդի հետ կապված նման բան պետք չէ ակնկալել, կարծում են քաղաքագետներն ու փորձագետները։

«Նույնիսկ նոր վարչապետի դեպքում, ես կարծում եմ, որ Մեծ Բրիտանիայի կառավարության դիրքորոշման մեջ, ամենայն հավանականությամբ, քիչ փոփոխություն կլինի Brexit-ի հիմնական հարցերի առումով, որոնք տարաձայնություններ են առաջացրել»,- ասել է Միացյալ Թագավորության հարցերով ԵՄ առաջատար օրենսդիր Դեւիդ Մաքալիսթերը:

Գի Վերհոֆսթադը, որը ԵՄ-ի առաջատար պատգամավորն է եղել Brexit-ի ողջ գործընթացի ժամանակ, ասել է, թե Ջոնսոնի ազդեցությունն այնպիսին էր, որ քիչ հավանական է, որ մեկ այլ պահպանողական վարչապետ կարող է սկզբունքորեն այլ կուրս ունենալ:

«Ոչ ոք պատրանք չունի, որ Դաունինգ Սթրիթից Ջոնսոնի հեռանալը կլուծի Մեծ Բրիտանիայի եւ ԵՄ-ի միջեւ հարաբերությունների բոլոր հիմնական խնդիրները,- գրել է Վերհոֆսթադը The Guardian-ի համար հոդվածում,- Վնասը, որ հասցրել է վարչապետն այն նախագծի միջոցով, որ իրականացնում էր իշխանության հասնելու համար, շարունակվում է ապրել»։

Մեծ Բրիտանիան միշտ եղել է ԵՄ «կիսալուրջ» անդամ 1973 թվականին դաշինքին միանալուց հետո։ Երբ Ջոնսոնը միացավ Բրյուսելի մամուլի կորպուսին մոտ երեք տասնամյակ առաջ, նա հաճախ էր հիացնում իր հայրենի ընթերցողներին պատմություններով, որոնք ունեին երկու հիմնական տարր՝ դրանք ԵՄ-ն ներկայացնում էին ամենամռայլ լույսի ներքո, եւ դրանք քիչ կապ ունեին իրականության հետ։

Լինելով պահպանողական քաղաքական գործիչ՝ 2016 թվականին ԵՄ-ին Մեծ Բրիտանիայի անդամակցության հանրաքվեի ժամանակ նա պաշտպանեց դաշինքը լքելու օգտին փաստարկները: Ջոնսոնն օգտագործեց իր թեթեւ կեցվածքն ու հումորային ոճը, որպեսզի խոսի ԵՄ-ից դուրս գալու առավելությունների մասին՝ երբեմն անտեսելով փաստերը: Նա առանցքային դեր խաղաց 2016 թվականի հանրաքվեում Brexit-ի քարոզարշավի հաղթանակում։

Թեեւ Brexit-ի առաջին տարիները չտվեցին այն պտուղները, որոնք խոստացել էր Ջոնսոնը, Մեծ Բրիտանիան ԵՄ վերադարձնելու ցանկացած հնարավոր ձգտում քննարկման առարկա չէր, քանի որ հիմնական ընդդիմադիր Լեյբորիստական կուսակցությունն այժմ կենտրոնացած է Brexit-ի իրավիճակից առավելագույն օգուտ քաղելու վրա:

Այնպես չէ, որ ԵՄ-ն ընդհանրապես կուզի երկիրը գրկաբաց հետ վերցնել, նշում է լրատվական գործակալությունը։