Աղվան Հովսեփյանը վիրահատվել է. «Հրապարակ»

«Հրապարակ» թերթը գրում է. «Հունիսի սկզբին նախկին գլխավոր դատախազ, ներկայում կալանավորված Աղվան Հովսեփյանը վիրահատվել է։ Նա լսողության հետ կապված հին խնդիրներ ուներ` կալանքը սրացում է առաջացրել: Վիրահատել են Միքայելյան հիվանդանոցում, այժմ հետվիրահատական շրջանն է, որը կարող է երկարել՝ հաշվի առնելով վիրահատության բարդությունը։

Հիշեցնենք․ Աղվան Հովսեփյանը մեղադրվում է հետեւյալում․ «2004-2013 թթ․` գլխավոր դատախազի, իսկ 2014-2018-ը՝ Քննչական կոմիտեի նախագահի պաշտոններում մտերիմ հարաբերությունների մեջ գտնվելով Արշավիր Սարգսյանի հետ՝ հիմնադրել է ձեռնարկատիրական գործունեություն իրականացնող կազմակերպություններ, որոնք ղեկավարել է անձամբ եւ իր որդիների միջոցով»։ Եվ «ապօրինի ձեռնարկատիրության արդյունքում ստացած եկամուտն օրինականացրել է»:

Եվս մի էպիզոդ վերաբերում է այն բանին, որ 2010 թ․ Արագածոտնի մարզի Բյուրականի համայնքապետ Հրաչյա Ավագյանին դրդել է «չարաշահել պաշտոնեական լիազորությունը», որի արդյունքում ստացված խոշոր չափերով գույքն օրինականացրել է․ խոսքը Բյուրականում Գրողների միության տան մասին է, որը պատկանում է Աղվան Գառնիկիչին: Մեղադրանքների մեծ մասը հիմնված է ցուցմունքների վրա, եւ փաստաբանները վստահ են, որ գործը դատարանում փլվելու է: Հովսեփյանը կալանքի տակ է 2021-ի սեպտեմբերից»:

Առավել մանրամասն՝ թերթի այսօրվա համարում: