ԵՄ-ի գագաթաժողովը թեկնածուի կարգավիճակ կտա Ուկրաինային և Մոլդովային. Շառլ Միշել

Եվրոպական խորհրդի նախագահ Շառլ Միշելը վստահություն է հայտնել, որ Եվրամիության անդամ պետությունների գագաթաժողովը հինգշաբթի ԵՄ-ին անդամակցության թեկնածուի կարգավիճակ կտա Ուկրաինային եւ Մոլդովային։

«Ես վստահ եմ, որ այսօր մենք թեկնածուի կարգավիճակ կտանք Ուկրաինային եւ Մոլդովային»,- ասել է նա լրագրողներին, նրա ելույթը հեռարձակվել է Եվրահանձնաժողովի կայքում։

Հիշեցնենք, որ այսօր Բրյուսելում մեկնարկում է Եվրամիության պետությունների եւ կառավարությունների ղեկավարների երկօրյա գագաթաժողովը, որի կարեւոր թեմաներն են լինելու ռուսական ագրեսիան, ինչպես նաեւ Ուկրաինային եւ Մոլդովային ԵՄ-ին անդամակցելու թեկնածուի կարգավիճակ տալը, նշվել է Եվրամիության կայքում։

Փաստաթղթում նշվել է, որ ԵՄ-ի ղեկավարները կքննարկեն իրավիճակի զարգացումը՝ Ուկրաինայի դեմ ռուսական պատերազմի հետ կապված, ներառյալ դրա ազդեցությունը պարենային անվտանգության գլոբալ ճգնաժամի վրա։ Նրանք նաեւ կքննարկեն Եվրամիության կողմից Ուկրաինային ցուցաբերվող տնտեսական, ռազմական, քաղաքական եւ հումանիտար աջակցության շարունակման հարցը։

ԵՄ երկրների ղեկավարները որպես առանձին հարց կդիտարկեն Ուկրաինային, Մոլդովային եւ Վրաստանին ԵՄ-ի անդամակցության տրամադրումը։ Հրապարակված հաղորդագրության մեջ հիշատակվել է, որ Ուկրաինան ԵՄ-ին անդամակցության հայտ է ներկայացրել 2022թ. փետրվարի 28-ին, իսկ Վրաստանը եւ Մոլդովան՝ 2022թ. մարտի 3-ին։ Եվրահանձնաժողովն իր պաշտոնական կարծիքը երեք երկրների հայտերի վերաբերյալ հրապարակել է 2022թ. հունիսի 17-ին։