Ռեցեսիան ամերիկյան տնտեսությունում մի ինչ-որ անխուսափելի բան չէ. Ջո Բայդեն

Նախագահ Ջո Բայդենը «Ասոշիեյթեդ պրես» գործակալության հարցազրույցում խոստովանել է, որ ամերիկացիները «շատ են ճնշվել» կորոնավիրուսի երկամյա համավարակի պատճառով, որը հանգեցրել է տնտեսական անկայունության եւ դարձել բենզինի գների կտրուկ բարձրացման պատճառներից մեկը, ինչը հարվածել է սովորական ընտանիքների բյուջեներին։

Ի դեպ, նախագահը ռեցեսիան ամերիկյան տնտեսությունում անխուսափելի մի բան չի համարում։ Բայդենը նաեւ վրդովմունք է հայտնել հանրապետական կոնգրեսականների հայտարարությունների առիթով, որոնք կարծում են, որ 40-ամյա առավելագույնին հասած գնաճի գլխավոր պատճառը COVID-19-ից տուժած ամերիկյան տնտեսության օգնության անցած տարվա փաթեթն է։ Նախագահն այս հավաստիացումը «տարօրինակ» է անվանել։

Բայդենը խոստովանել է, որ ամերիկացի ժողովուրդը ընդհանուր առմամբ «իսկապես շատ ճնշված է»։

«Նրանք իսկապես իրենց ճնշված են զգում,- ասել է նա։- Հոգեկան առողջության պահպանման պահանջը խիստ ավելացել է ամերիկացիների շրջանում, որովհետեւ մարդիկ բախվել են տագնապի զգացողությանը։ Այն ամենը, ինչի հետ հույս էին կապում նրանք, խափանվել է։ Բայց դա հիմնականում այն բանի հետեւանք է, ինչը տեղի է ունեցել... COVID-ի հետ կապված ճգնաժամի պատճառով»։

30 րոպեանոց հարցազրույցում, որը Բայդենը տվել է Սպիտակ տան Օվալաձեւ աշխատասենյակում, նախագահը մեկնաբանել է տնտեսագետների նախազգուշացումներն այն մասին, որ Միացյալ Նահանգները կարող է բախվել ռեցեսիայի։

«Նախ՝ դա անխուսափելի մի բան չէ»,- ասել է նա։- Երկրորդ՝ մենք ավելի շատ շանսեր ունենք հաղթահարելու այս գնաճը, քան աշխարհի ցանկացած այլ երկիր»։

Ինչ վերաբերում է գնաճի պատճառներին, Բայդենն այս հարցում պաշտպանողական դիրքորոշում է զբաղեցրել։ «Եթե դա իմ մեղքն է, ապա ինչո՞ւ ցանկացած այլ խոշոր, արդյունաբերապես զարգացած երկրում գնաճն ավելի բարձր է»,- ասել է նա։

Նախագահը հայտարարել է, որ լավատեսության հիմքեր է տեսնում 3,6 տոկոսանոց գործազրկության ցածր մակարդակի եւ համաշխարհային ասպարեզում Ամերիկայի համեմատական ուժի հետ կապված։

«Համոզված եղեք, որովհետեւ ես դրանում համոզված եմ, որ մենք ավելի շատ հնարավորություններ ունենք, քան աշխարհի ցանկացած այլ երկիր, որպեսզի առաջինը լինենք XXI դարի երկրորդ քառորդում,- ասել է Բայդենը։- Դա չափազանցություն չէ, այլ փաստ է»։