Թրամփի կարծիքով՝ կոնգրեսականները փորձում են թույլ չտալ, որ ինքն առաջադրվի նախագահի թեկնածու

ԱՄՆ Կոնգրեսը, որը հետաքննում է 2021թ. հունվարի 6-ին Կապիտոլիումի գրոհի հանգամանքները, իր գործողություններով փորձում է թույլ չտալ, որպեսզի նախկին նախագահ Դոնալդ Թրամփը կարողանա առաջադրվել նախագահի թեկնածու նոր ժամկետի համար։ Սպիտակ տան նախկին ղեկավարն այսպիսի կարծիք է հայտնել երկուշաբթի տարածած հայտարարությունում։

«Դա պարզապես փորձ է՝ կանգնեցնելու դեմոկրատների եւ հանրապետականների բոլոր հարցումներում մեծ տարբերությամբ առաջին տեղում ընթացող մարդուն, որպեսզի նորից չառաջադրվի նախագահի պաշտոնին»,- ասել է նա։

Հանրապետականի խոսքով՝ նրա պոպուլյարությունը կապված է ԱՄՆ-ում նկատվող գնաճի ռեկորդային տեմպերի, ինչպես նաեւ վառելիքի գների, Վաշինգտոնի մրցակիցներից էներգետիկ կախվածության, անլեգալ միգրանտների հոսքի եւ մատակարարումների շղթայի խախտումների հետ։

«Դեմոկրատները գիտեն, որ ես կարող եմ այդ ամենն ուղղել, ուստի իրենցից կախված ամեն ինչ անում են, որպեսզի կանգնեցնեն ինձ»,- ասել է նա։

Կոնգրեսի ստորին պալատի հատուկ կոմիտեն հունիսի 9-ի առաջին բաց լսումներում ցուցադրել է հետաքննության հավաքած նյութերի մի մասը։ Դրանք, օրենսդիրների կարծիքով, վկայում են այն բանի օգտին, որ Թրամփը պատասխանատվություն է կրում մայրաքաղաքի կենտրոնում 2021թ. հունվարի 6-ի անկարգությունների համար։ Կոմիտեի նախագահ Բենի Թոմփսոնը (դեմոկրատ Միսիսիպիի նահանգից) քաղաքական գործչի գործողությունները բնութագրել է որպես «մասշտաբային, բազմաստիճան դավադրություն՝ նախագահական ընտրությունների կեղծման նպատակով»։ Նրա խոսքով՝ իրադարձությունները ԱՄՆ Կոնգրեսի շենքում «հեղաշրջման փորձի գագաթնակետն էին»։

2021թ. հունվարի 6-ին հանրապետական Թրամփի կողմնակիցները ներխուժել են Կոնգրեսի շենք՝ խոչընդոտելու համար 2020թ. նոյեմբերին երկրում տեղի ունեցած նախագահական ընտրությունների արդյունքների հաստատմանը։ Դրանցում հաղթանակ էր տարել դեմոկրատ Ջո Բայդենը։ Շենքի ներսում տեղի ունեցած անկարգությունների ժամանակ ոստիկանությունը գնդակահարել էր մի ցուցարար կնոջ։ Բացի այդ, գրանցվել էին էլի մի քանի մարդու՝ միմյանց հետ կապ չունեցող մահվան դեպքեր, որոնք որակվել էին որպես բժշկական բնույթի արտակարգ դեպքեր։ Բախումներից հետո մահացել էր Կապիտոլիումի ոստիկանության աշխատակիցը։