Իտալիայում արդարադատության հարցերին նվիրված հանրաքվեն ձախողվել է

Կիրակի Իտալիայում տեղի ունեցած հանրաքվեն հինգ հարցերի վերաբերյալ, որոնք վերաբերում էին երկրի իրավաբանական համակարգի մի շարք դրույթների չեղարկմանը, անհրաժեշտ քվորում՝ 50 տոկոս, չի ապահովել։ Էքզիտպոլերի տվյալների համաձայն, որոնք ներկայացրել է Rai News 24 հեռուստաալիքը, ընտրատեղամասերի փակման պահին մասնակցությունը հանրաքվեին կազմել է 19-23 տոկոս։

Ինչպես այս առնչությամբ նշել են իտալական լրատվամիջոցները, կիրակի տեղի ունեցած հանրաքվեն կարող է դառնալ ամենաանհաջողներից մեկն իտալական պատմության մեջ՝ մասնակցության տեսակետից։

Քվեարկության ներկայացված հարցերը հիմնականում տեխնիկական էին եւ վերաբերում էին դատավորների նշանակմանն ու իրավաբանական ընթացակարգերին, այդ թվում նախնական կալանքի ժամկետների կրճատմանը։ Հարցերից մեկը վերաբերում էր այսպես կոչված Սեւերինոյի օրենքի չեղարկմանը, որը խորհրդարանն ընդունել էր 2012թ.։ Այն ժամանակվա արդարադատության նախարար Պաոլա Սեւերինոյի անունն ստացած օրենքը նախատեսում է կառավարման կառույցներին մասնակցության եւ հանցագործությունների համար դատապարտվածներին ընտրովի պաշտոններում առաջադրելու անհնարինություն։ Այդ օրենքի համաձայն՝ սենատորի պաշտոնից զրկվել էր Իտալիայի վարչապետ Սիլվիո Բեռլուսկոնին, որը 2012թ. դատական ատյանների կողմից մեղավոր էր ճանաչվել իր Mediaset մեդիա-ընկերությունում կատարած ֆինանսական խարդախությունների եւ կոռուպցիայի համար։