ՆԱՍԱ-ն սկսում է ՉԹՕ-ների ուսումնասիրությունը

ՆԱՍԱ-ն սկսում է ՉԹՕ-ների ուսումնասիրությունը։ Տիեզերական գործակալությունը հայտարարել է անկախ թիմի ստեղծման մասին, որը կփորձի պարզել, թե որքան հանրային տեղեկատվություն է հասանելի թեմայի վերաբերյալ եւ որքան ավելին է անհրաժեշտ անբացատրելի երեւույթները հասկանալու համար, հասնում է PA Media-ն:

Փորձագետները նաեւ կքննարկեն, թե ինչպես լավագույնս օգտագործեն այս ամբողջ տեղեկատվությունն ապագայում:

ՆԱՍԱ-ի գիտական առաքելության ղեկավար Թոմաս Զուրբուխենը խոստովանել է, որ ավանդական գիտական համայնքը կարող է ՆԱՍԱ-ի որոշումը «մի տեսակ դավաճանություն» համարել, սակայն ինքը կտրականապես համաձայն չէ դրա հետ:

«Մենք չենք խուսափում հեղինակության ռիսկերից»,- ասել է Զուրբուխենը: «Մենք խորապես համոզված ենք, որ այս երեւույթների ամենամեծ խնդիրն այն է, որ սա անբավարար ծավալով տվյալների դաշտ է»։

ՆԱՍԱ-ն սա համարում է առաջին քայլը՝ փորձելով բացատրել երկնքում առեղծվածային դիտարկումները, որոնք հայտնի են որպես Չճանաչված թռչող օբյեկտներ (UAP):

Ուսումնասիրությունը կսկսվի այս տարեվերջին, կտեւի ինը ամիս եւ կարժենա 100 000 դոլարից ոչ ավելի: Այն ամբողջությամբ բաց է լինելու՝ առանց ռազմական գաղտնի տվյալների օգտագործման։

ՆԱՍԱ-ն հայտնել է, որ թիմը կգլխավորի աստղաֆիզիկոս Դեւիդ Սպերգելը, որը Սայմոնսի գիտական հետազոտությունների հիմնադրամի նախագահն է:

Սպերգելը նշել է, որ հետազոտության հետ կապված միակ կանխակալ կարծիքն այն է, որ UAP-ը, ամենայն հավանականությամբ, կունենա մի քանի բացատրություններ: «Իմ կարիերայի մեծ մասը ես զբաղվել եմ տիեզերագիտությամբ: Կարող եմ ձեզ ասել, որ մենք չգիտենք, թե ինչից է կազմված տիեզերքի 95 տոկոսը: Այնպես որ, կան բաներ, որոնք մենք չենք հասկանում»: