«Ուտեստ Ֆեստ» ազգային տոնածիսական ուտեստների փառատոնը կկազմակերպվի Երեւանի «Խաչքարերի պուրակում»

Երևանի քաղաքապետարանը սիրով հրավիրում է մասնակցելու «Ուտեստ ֆեստ» տոնածիսական ուտեստների փառատոնին, որն այս տարի տեղի կունենա ս.թ. հունիսի 11-ին՝ ժամը 17:00-21:00-ն, «Խաչքարերի պուրակում» (Կ. Դեմիրճյանի անվան մետրոպոլիտենի «Հանրապետության հրապարակ» կայարանի հարակից այգում):

Քաղաքապետարանից հայտնում են, որ Փառատոնի նպատակն է հանրությանը, այդ թվում՝ Երևան այցելած զբոսաշրջիկներին ներկայացնել հայկական ավանդական տոնածիսական ուտեստների հարուստ ընտրանին և հայկական տոնացույցի կերակրատեսակները:

Կներկայացվեն Հայ Առաքելական եկեղեցու հինգ տաղավար և հայկական ավանդական տոները, դրանց խորհուրդը, ծիսական ավանդույթներն ու ուտեստները:

Միջոցառումը կուղեկցվի հայկական ազգային երգով ու պարով:

Փառատոնն անցկացվում է Երևանի քաղաքապետարանի աշխատակազմի մշակույթի և տուրիզմի վարչության և «Հայ խոհարարական ավանդույթների զարգացման և պահպանման» ՀԿ-ի հետ համատեղ։