Թուրքիայի իսլամիստ առաջնորդը ՆԱՏՕ-ն օգտագործում է ԱՄՆ-ի դաշնակիցներին պատժելու համար․ Fox News

Թուրքիայի ավտորիտար իսլամիստ առաջնորդ Ռեջեփ Թայիփ Էրդողանը գնալով ավելի է օգտագործում ՆԱՏՕ-ն՝ իր ազգային շահերն առաջ մղելու համար: Վերջին շաբաթների ընթացքում նա ուժեղացրել է զենքի իր թափահարումները՝ արգելափակելով կազմակերպությանը Շվեդիայի եւ Ֆինլանդիայի միանալը, եւ այժմ պատրաստ է ներխուժել Սիրիայի հյուսիս, որտեղ քրդերը, որոնք ԴԱԻՇ-ի դեմ պայքարում ԱՄՆ-ի գործընկերն են, գտնվում են նրա թիրախում, հաղորդում է Fox News-ը:

Թուրքիայի հարցերով փորձագետ եւ Թել Ավիվի համալսարանի ավագ գիտաշխատող, պրոֆեսոր Օֆրա Բենջիոն Fox News Digital-ին ասել է. «Էրդողանի համար Սիրիայում բուֆերային գոտի ստեղծելու լավ ժամանակն է, քանի որ Ռուսաստանը ներգրավված է Ուկրաինայում, եւ հենց Մոսկվային է պետք Թուրքիան, որովհետեւ նա կարող է վետո դնել ՆԱՏՕ-ին Ֆինլանդիայի եւ Շվեդիայի միանալու վրա»։ Նա հավելել է, որ այժմ ժամանակն է, որ Էրդողանը բաժանի Սիրիան, քանի որ «ԱՄՆ-ն այս տարածաշրջանում ներգրավված չէ»:

Խոսքը միայն Ֆինլանդիայի եւ Շվեդիայի մասին չէ: Էրդողանը կարծես իր տեսակետն ապացուցելու համար անցյալ շաբաթ բացեց երկրորդ նոր ճակատը ՆԱՏՕ-ի հետ, երբ դադարեցրեց Հունաստանի հետ բանակցությունները:

ՆԱՏՕ-ի հետ Էրդողանի վերջին «պատերազմը» տարածվել է Սիրիայում եւ ազդում է ԱՄՆ-ի կենսական շահերի վրա: Էրդողանը վաղուց ցանկություն է հայտնել վերացնել ԱՄՆ-ի դաշնակից քրդերի հենակետը Սիրիայի հյուսիսում եւ ստեղծել առավելապես արաբներով բնակեցված շրջան:

Էրդողանի խանդավառված հայրենասիրության վերջին փուլը տագնապ է առաջացրել Վաշինգտոնում, քանի որ YPG-ի ռազմական ուժը, որը հիմնականում կազմված է սիրիացի քրդերից, առանցքային դեր է խաղացել ԴԱԻՇ-ին հաղթելու հարցում ԱՄՆ-ի բանակին օգնելու համար:

Պետքարտուղար Էնթոնի Բլինքենը վերջերս հստակեցրեց, որ ԱՄՆ-ը դեմ է թուրքական ցանկացած ներխուժման՝ զգուշացնելով, որ դա կարող է խաթարել տարածաշրջանի կայունությունը եւ հնարավորություն տալ ահաբեկչական խմբավորումներին:

Թուրքիային մեղադրում են Սիրիայում «Իսլամական պետության» նկատմամբ մեծ ներողամտություն ցուցաբերելու մեջ։ YPG-ի վտարումը կարող է նշանակել տարածաշրջանում «Իսլամական պետության» եւ այլ ջիհադական ահաբեկչական կազմակերպությունների վերածնունդ, ասում են իրավիճակին ծանոթ ռազմական պաշտոնյաները: Ինչպես հայտնի է դարձել Fox News Digital-ին, սիրիացի քրդերը խիստ անհանգստացած են մոտալուտ ներխուժման մասին Էրդողանի հայտարարությամբ։

Էրդողանը թուրքական էքսպանսիոնիզմի իր ծրագիրը բյուրեղյա հստակությամբ ձեւակերպել է դեռ 2016 թվականին:

«Իրաքի, Սիրիայի, Լիբիայի, Ղրիմի, Ղարաբաղի, Բոսնիայի եւ այլ եղբայրական շրջանների մասին հոգ տանելը Թուրքիայի եւ՛ պարտականությունն է, եւ՛ իրավունքը։ Թուրքիան միայն Թուրքիան չէ։ Այն օրը, երբ մենք կհրաժարվենք նրանցից, դա այն օրն է, երբ մենք կհրաժարվենք մեր անկախությունից եւ մեր ապագայից»,- այն ժամանակ ասել էր Էրդողանը:

Օսմանյան կայսրությունը երկար ժամանակ վերահսկել է Սիրիայի այն տարածքները, որոնք Էրդողանը ձգտում է նվաճել: Թուրք վերլուծաբան եւ լրագրող Ուզայ Բուլութը, որը նախկինում բնակվել է Անկարայում, Fox News Digital-ին ասել է. «Հետամուտ լինելով Օսմանյան կայսրությունը վերականգնելու իր երազանքին՝ Էրդողանը Հյուսիսային Սիրիայի եւ Իրաքի մի մասը հրապարակայնորեն Թուրքիայի մաս հայտարարեց: Էրդողանի նպատակը «նեոօսմանական էքսպանսիոնիզմն է»,- նշել է Բուլութը՝ հավելելով, որ «Թուրքիան ագրեսոր է տարածաշրջանում»։