ԱՄՆ Կոնգրեսը հետաքննում է Թրամփի վարչակազմի կողմից օտարերկրյա կառավարությունների նվերները թաքցնելու հարցը

ԱՄՆ Կոնգրեսի ստորին պալատի դեմոկրատները հետաքննություն են սկսել նախկին նախագահ Դոնալդ Թրամփի վարչակազմի անդամների կողմից օտարերկրյա կառավարությունների ներկայացուցիչների արժեքավոր նվերների հնարավոր թաքցնելու վերաբերյալ։ Համապատասխան հայտարարությունը երեքշաբթի հրապարակվել է ԱՄՆ Կոնգրեսի Ներկայացուցիչների պալատի վերահսկողության եւ կառավարության բարեփոխումների հանձնաժողովի կայքում։

Փաստաթղթում նշվում է, որ Պետդեպարտամենտի ներկայացուցիչները նախկինում հանձնաժողովի անդամներին ծանուցել են, որ Թրամփի վարչակազմի աշխատակիցները նրա նախագահության վերջին տարում «առաջնահերթությունը չեն տվել պարտավորությունների կատարմանը»՝ օտարերկրյա պաշտոնյաներից նվերներ ստանալու մասին տեղեկատվություն տրամադրելու առումով։ Այս կապակցությամբ Կոնգրեսի ստորին պալատի հանձնաժողովի դեմոկրատների մոտ կասկածներ են առաջացել «նախագահ Թրամփի վրա օտար կառավարությունների հնարավոր ոչ պատշաճ ազդեցության մասին, որը կարող է վտանգել ազգային անվտանգությունը եւ արտաքին քաղաքականության մեջ ԱՄՆ շահերը»:

Ըստ ամերիկյան օրենսդրության՝ ԱՄՆ պաշտոնյաներին թույլատրվում է միայն վարչակազմի անունից նվերներ ընդունել օտարերկրյա կառավարություններից: Միաժամանակ, եթե նվերի արժեքը գերազանցում է 415 դոլարը, վարչակազմի ներկայացուցիչները պարտավորվում են այն փոխանցել ԱՄՆ կառավարության սեփականությանը։ Նվերների հաշվետվությունները պետք է զեկուցվեն Պետդեպարտամենտին:

Այս տարվա ապրիլին Պետդեպարտամենտը հայտնել էր, որ իր պաշտոնյաները չեն կարողացել կազմել օտարերկրյա ներկայացուցիչներից Թրամփի վարչակազմի ստացած նվերների ամբողջական ցուցակը։ Մասնավորապես, ԱՄՆ ԱԳՆ-ը չի կարողացել բացահայտել այն պաշտոնյաներին, որոնք նվերներ են ստացել օտարերկրյա կառավարությունների ներկայացուցիչներից, եւ չի գտել տվյալներ, թե կոնկրետ ովքեր են արժեքավոր նվերներ տվել ամերիկացի պաշտոնյաներին։