Մեծ Բրիտանիան մտադիր է աշխատել ավիացիոն ճյուղի հետ՝ խուսափելու համար օդանավակայանների «քաոսից»

Մեծ Բրիտանիայի տրանսպորտի նախարար Գրանտ Շափսը կիրակի հայտարարել է, որ կառավարությունն ակտիվորեն աշխատելու է ավիացիոն ճյուղի հետ՝ խուսափելու համար անցած շաբաթ օդանավակայաններում տիրած «քաոսի» կրկնությունից, երբ ուղեւորները ստիպված են եղել բախվել երկարատեւ ձգձգումների եւ հարյուրավոր չվերթների չեղարկման, տեղեկացրել է Reuters-ը։

Օդանավակայաններն ամբողջ Եվրոպայում դժվարությամբ են հաղթահարում կորոնավիրուսի համավարակից հետո ավելացած պահանջարկը, բայց բրիտանական օդանավակայանները հատկապես տուժել են անցած շաբաթվա լուրջ խափանումներից։ Դպրոցներում սկսվել են արձակուրդները, իսկ երկրում երկարատեւ տոնական հանգստյան օրեր էին Եղիսաբեթ թագուհու 70-ամյա գահակալության առիթով։

Շափսը, որն այս շաբաթ ավելի վաղ հայտարարել էր, որ ավիաընկերությունները պետք է դադարեցնեն այն չվերթների տոմսերի վաճառքը, որոնց համար անձնակազմ հավաքել չեն կարող, ասել է, որ ճյուղը պետք է լուծի այդ խնդիրը։

«Արդյունաբերությունն ինքը պետք է լուծի այդ խնդիրը»,- ասել է նա BBC հեռուսաալիքի հարցազրույցում։- Կառավարությունը չի տնօրինում օդանավակայանները, չի կառավարում ավիաընկերությունները։ Դա պետք է անի ճյուղը»։

Շափսը նշել է, որ անձնակազմի կրճատումը համավարակի ժամանակ չափից ավելի խորն էր։

Նրա խոսքով՝ օրենսդրության փոփոխությունները հեշտացնում են վարչական ընթացակարգերը, որոնք անհրաժեշտ են անվտանգությունն ստուգելու համար եւ չեն նախատեսում, որ ստուգումն արագացնելու համար ստիպված են ներգրավել բանակը։