Իսրայելը ռիսկային ակտիվներ կգնի չինական յուանի ավելացումից եւ դոլարային ակտիվների կրճատումից հետո

Իր ակտիվներին չինական յուան ավելացնելուց հետո Իսրայելի կենտրոնական բանկը կշարունակի դիվերսիֆիկացնել իր պաշարները՝ ներառելով ավելի շատ բաժնետոմսեր եւ բարձր եկամտաբերության կորպորատիվ պարտատոմսեր:

«Մենք ունենք արժույթների ավելի լայն տեսականի, եւ մենք պատրաստվում ենք նաեւ ավելի լայն գործիքակազմ օգտագործել»,- Bloomberg-ին տված հարցազրույցում ասել է Իսրայելի կենտրոնական բանկի ղեկավար Ամիր Յարոնը:

Ավելի շատ բաժնետոմսերի եւ ավելի ռիսկային ակտիվներին անցումը բանկի վերջին տասնամյակի ամենամեծ պորտֆելի վերափոխման եւ զարգացող ներդրումային «փիլիսոփայության» մի մասն է:

Նախկինում Իսրայելի կենտրոնական բանկում պահվում էր միայն ԱՄՆ դոլար, եվրո եւ բրիտանական ֆունտ։ Սակայն ապրիլին նա կրճատեց դոլարով եւ եվրոյով իր ակտիվները՝ ավելացնելով յուանը, ինչպես նաեւ կանադական եւ ավստրալական արժույթներն ու ճապոնական իենը: Փոփոխությունները տեղի են ունենում, քանի որ Իսրայելը ձգտում է ընդլայնել իր ներդրումային հորիզոնը եւ ավելի մեծ եկամուտ ստանալ իր արտարժութային մոտ 200 միլիարդ դոլարի պահուստներից:

Այժմ բանկի պահուստների մոտ 2 տոկոսը յուանով է, իսկ կանադական եւ ավստրալական արժույթներովը կկազմի մոտ 3,5 տոկոս, ըստ բանկի տարեկան հաշվետվության։ Եվրոյի մասնաբաժինը 30 տոկոսից իջել է 20 տոկոսի, մինչդեռ դոլարին բաժին է ընկնում 61 տոկոսը՝ համեմատած 66,5 տոկոսի հետ։

Այս տարվա սկզբին Արժույթի միջազգային հիմնադրամը հայտնել էր, որ դոլարի մասնաբաժինը համաշխարհային արտարժույթի ընդհանուր պահուստներում ընկել է մինչեւ վերջին երկու տասնամյակի ամենացածր մակարդակը, ինչը յուանի աճի մասին ենթադրությունների տեղիք է տվել:

Սակայն փորձագետներն ասում են, որ համաշխարհային տնտեսությունը պետք է միաժամանակ կորցնի հավատը դոլարի նկատմամբ եւ վստահություն ձեռք բերի Չինաստանի դրամավարկային քաղաքականության նկատմամբ, որպեսզի համաշխարհային պահուստներում որեւէ էական փոփոխություն տեղի ունենա: