ՆԱՏՕ-ն Թուրքիայի հետ Ֆինլանդիայի եւ Շվեդիայի հանդիպում կանցկացնի՝ դաշինքին նրանց անդամակցության վերաբերյալ

ՆԱՏՕ-ն Թուրքիայի, Ֆինլանդիայի եւ Շվեդիայի բարձրաստիճան ներկայացուցիչների հանդիպում կանցկացնի՝ դաշինքին այդ երկու երկրների անդամակցության խնդրի լուծման համար, ինչին Անկարան առայժմ չի սատարում։ Այս մասին չորեքշաբթի ասել է ՆԱՏՕ-ի գլխավոր քարտուղար Յենս Սթոլտենբերգը, ԱՄՆ պետքարտուղար Էնթոնի Բլինքենի հետ հանդիպումից հետո հրավիրված մամուլի ասուլիսում։

«Ես մտադիր եմ կազմակերպել Թուրքիայի, Շվեդիայի եւ Ֆինլանդիայի բարձրաստիճան ներկայացուցիչների հանդիպում Բրյուսելի կենտրոնատեղիում՝ լուծելու համար այդ խնդիրը,- ասել է նա։- Յուրաքանչյուր երկիր իրավունք ունի ունենալ իր մտահոգություններն անվտանգության հետ կապված, եւ ես համոզված եմ, որ մենք կկարողանանք լուծել այդ հարցը բանակցությունների սեղանի շուրջ»։

Նա ընդգծել է, որ ՆԱՏՕ-ն ջանալու է առաջ շարժվել. «Թուրքիան ՆԱՏՕ-ի շատ կարեւոր երկիր է, եւ մենք առավելագույն ջանքեր կգործադրենք, որպեսզի ցրենք նրա մտահոգությունները»։

Թուրքիան դեմ է ՆԱՏՕ-ին Շվեդիայի եւ Ֆինլանդիայի անդամակցությանը, քանի որ այդ երկրներն աջակցում են քրդական ուժերին Թուրքիայում, Իրաքում եւ Սիրիայում, որոնց Անկարան համարում է ահաբեկչական։ Նա Շվեդիայից եւ Ֆինլանդիայից պահանջում է այդ կազմակերպությունները հայտարարել ահաբեկչական եւ դադարեցնել նրանց ցուցաբերվող աջակցությունը։