Հունաստանի վարչապետը Գերմանիայի կանցլերին ցույց է տվել «Կապույտ հայրենիքի» քարտեզը՝ Թուրքիայի հավակնություններով
Հունաստանի վարչապետ Կիրիակոս Միցոտակիսը Գերմանիայի կանցլեր Օլաֆ Շոլցին ցույց է տվել «Կապույտ հայրենիքի» քարտեզը` Թուրքիայի հավակնություններով Միջերկրական ծովի մեծ հատվածներին նկատմամբ, որպեսզի ներկայացնի երկրի տեսակետն Անկարայի էքսպանսիոնիստական միտումների վերաբերյալ, գրում է Katimerini-ն։
Միցոտակիսը եւ Շոլցը հանդիպել են Բրյուսելում ԵՄ գագաթնաժողովի շրջանակում Հունաստանի եւ Թուրքիայի միջեւ լարվածության սրման ֆոնին, երբ Անկարան սպառնում է վիճարկել Հունաստանի ինքնիշխանությունն արեւելյան Էգեյան ծովի կղզիներում: Ըստ աղբյուրների՝ Միցոտակիսը Շոլցին մանրամասն տեղեկացրել է այդ բոլոր իրադարձությունների, այդ թվում՝ Թուրքիայի կողմից Հունաստանի օդային տարածքի խախտման մասին։
Միցոտակիսն ասել է, որ ինքը Բեռլինին հստակ հայտնել է իր դիրքորոշումը՝ նշելով, որ Գերմանիան չպետք է հավասար հեռավորության դիրքորոշում որդեգրի։ Կանցլերը, ըստ Միցոտակիսի, «հասկացել է խնդրի մասշտաբները»։ «Կապույտ հայրենիքի քարտեզը լավագույն ապացույցն է առ այն, որ Թուրքիան սպառնում է մեզ»,- հավելել է նա։
Մինչդեռ Ֆրանսիայի նախագահ Էմանուել Մակրոնը հույն-թուրքական հարաբերությունների վերաբերյալ կտրուկ հայտարարություն է տարածել։
«Հունաստանի վարչապետը օրինական մտահոգություն է հայտնել եւ դատապարտել է որոշ թուրք պաշտոնյաների հայտարարությունները, որոնք կասկածի տակ են դնում Հունաստանի ինքնիշխանությունը նրա շատ կղզիների նկատմամբ: Ուզում եմ հայտնել բոլոր եվրոպացիների, հատկապես Ֆրանսիայի աջակցությունը։ Այսօր ոչ ոք չի կարող կասկածի տակ դնել որեւէ անդամ պետության ինքնիշխանությունը»,- ասել է նա:
«Այդ հայտարարությունները պետք է հնարավորինս շուտ դատապարտվեն, եւ դա հենց այն է, ինչ ես անում եմ այստեղ՝ ձեր առջեւ», - ասել է Մակրոնը։
Միցոտակիսը լրագրողներին ասել է, որ իր գործընկերներին տեղեկացրել է «թուրքական սադրանքների սրման մասին»։
«Ես խնդրեցի, որ եթե Թուրքիան շարունակի այս մարտավարությունը, ապա հարցը պետք է քննարկվի հունիսին կայանալիք հաջորդ հանդիպմանը եւ եզրակացություններում հստակ ձեւակերպում պետք է լինի»,- ընդգծել է վարչապետը։