Արգիշտի Քյարամյանին հարցեր ունենք տալու, սպասում ենք, որ իջնի. զոհված զինծառայողների մայրերը ՔԿ-ի մոտ էին

44-օրյա պատերազմում զոհված զինծառայողների մայրերը Քննչական կոմիտեի դիմաց սպասում են ՔԿ պետ Արգիշտի Քյարամյանին:

Ծնողներից մեկը հիշեցրեց, որ օրեր առաջ ինքնաբացարկի միջնորդություն են ներկայացրել Քյարամյանին, որ նա հրաժարվի գործը քննելուց, սակայն մերժել է այդ միջնորդությունը։

«Այսօր լրանում է ժամկետը: Այսօր եկել ենք մամաներով, որ պարոն Քյարամյանը իջնի եւ բավարարի մեր միջնորդությունը: Մենք պայքարելու ենք մինչեւ հասնենք դրական պատասխանի»,- ասաց նա:

Մեկ այլ ծնող էլ նշեց, որ ակնհայտ է, որ բոլոր ատյաններ էլ ծառայում են օրվա իշխանություններին. «Զարմանալի չէ, որ տեւական ժամանակ է, որ ծնողներին, այրիներին տանում են էս ատյանից էն ատյան, ու իրենց գործով զբաղվելու փոխարեն փորփրում են ծնողների անցյալը, իրենց կեղտոտ լրատվականներով փորձում են մրոտել: Մեզ չեն կարող լռեցնել»:

Ծնողները պատմեցին, որ ՔԿ պետ Արգիշտի Քյարամյանի հետ օրեր առաջ տեղի ունեցած նհանդիպմանը մի փոքր լարվածություն է եղել. «Ծնողն այն իրավիճակում է, որ նորմալ է, որ ինքը բորբոքվի, բայց նորմալ չի, որ իր կարգավիճակի պաշտոնյա մարդը իրեն դրսեւորի ավելի վատ ձեւով, այսինքն հենց դրանից մեզ մոտ անվստահություն է առաջացել: Այսօրվա մեր այստեղ հավաքվելու նպատակը հենց դա է, որ չենք վստահում: Մենք 8-10 օր առաջ իր հետ հանդիպել ենք, դեռ ոչ մի նորություն չկա, արձագանք չկա: Թողի իջնի մեր հարցերին, մեր միջնորդությանը պատասխանի: Հակառակ դեպքում մենք այս կառույցից հանելու ենք մեր դիմումը»,-ասաց մայրերից մեկը:

Նշենք, որ 44-օրյա պատերազմում զոհված զինծառայողների մայրերն հավաքվել են Քննչական կոմիտեի դիմաց՝ պահանջելով հանդիպում Քննչական կոմիտեի նախագահ Արգիշտի Քյարամյանի հետ: Նրանք ինքնաբացարկի միջնորդություն էին ներկայացրել Քյարամյանին, քանի որ գործը տեղից չի շարժվում, իսկ Քյարամյանը, ըստ նրանց, կատարում է իշխանությունների հրահանգները: Նրանց ներկայացրած հնգօրյա վերջնաժամկետը լրանում է այսօր: Տուժողի իրավահաջորդի կագավիճակ ստացած՝ զոհվածների ծնողները, հիշեցնեմ՝ Նիկոլ Փաշինյանին ձերբակալելու միջնորդություն էին ներկայացրել զինվորական դատախազություն, ինչը մերժվել է, իսկ Փաշինյանը առաջիկայում կհրավիրվի հարցաքննության: