ԱՄՆ-ի նոր հրթիռային համակարգերը Ուկրաինային թույլ կտան խոցել թիրախները 80 կմ հեռավորության վրա

Միացյալ Նահանգները Ուկրաինային անվտանգության ոլորտում օգնելու 11-րդ փաթեթի շրջանակներում այնտեղ կուղարկի ամերիկյան արտադրության բարձր շարժունակության հրետանային հրթիռային համակարգեր, որոնք հայտնի են որպես HIMARS։

Պաշտոնատար անձինք հայտարարել են, որ HIMARS-ը հագեցած կլինի զինամթերքով, որը թույլ կտա Ուկրաինային մինչեւ մոտ 80 կիլոմետր հեռավորությամբ հրթիռներ արձակել։

Սա շատ ավելի քիչ է, քան համակարգերի առավելագույն հեռահարությունը, որը մոտ 300 կիլոմետր է կազմում, բայց շատ ավելին է, քան այն ամենը, ինչ մինչ օրս ուղարկվել է Ուկրաինա: Օրինակ, անցյալ ամիս ԱՄՆ-ը Ուկրաինա ուղարկեց M777 հաուբիցներ, որոնք նշանավորեցին հեռահարության եւ հզորության զգալի աճը նախորդ համակարգերի համեմատ, սակայն նույնիսկ դրանք ունեն մոտ 25 կիլոմետր առավելագույն հեռահարություն, հաղորդում է CNN-ը։

Անվտանգության աջակցության նոր փաթեթը, որի մասին պաշտոնապես կհայտարարվի չորեքշաբթի օրը, ներառում է նաեւ օդային հսկողության ռադարներ, Javelin լրացուցիչ հակատանկային զենքեր, հրետանային արկեր, ուղղաթիռներ, մարտավարական մեքենաներ եւ պահեստամասեր։